uMthunywa
YiNtatheli kaMthunywa
AMADODA amane ahlala edolobheni lakoBulawayo ayifunde ivaliwe ukuthi kulicala ukutshaya isela.
UFortune Sibanda oleminyaka yokuzalwa engu-26, ohlala eLuveve, uFungai Manuela (35) oweMakhandeni, uKudakwashe Mashinya (27) loBlessed Gausi (21) abahlala elokitshini lePumula North bamiswe phambili komthethwandaba besetheswa icala lokutshaya uMnumzana Prince Mlotshwa ngoba bethi watshontsha ifoni.
Omunye wamadoda la owancedisa ukutshaya uMlotshwa kubikwa akwaziwa ukuthi ucatshe ngaphi njalo usadingwa ngamapholisa.
Abasolwa laba, loba bethe abalacala, baphenduke izithutha phambili kukamantshi uShepherd Munjanja.
Inkundla izwe ukuba mhlaka 25 kuMfumfu, ngehola lesihlanu ntambama, enzikini yedolobho lakoBulawayo, amadoda amane la ehlangane lenye indoda le okungaziwayo ukuthi ingaphi, ahlasela uMlotshwa emethesa icala lokweba umakhalekhukhwini.
Esethula udaba lolu enkundleni, umtshutshisi uMnumzana Leonard Chile uthe: “Umsolwa wesibili watshaya umamangala ngempama kanenginengi, ehlose ukuthi amvumise ngenkani ukuthi nguye otshontshileyo.
“Ngaleso isikhathi, umsolwa uSibanda wagongoda umamangala ngesidindi se-golf club kabili eqolo.”
Umtshutshisi uthe abasolwa uGausi loMashinya labo bamhlukumeza ngokumtshaya umamangala.
Inkundla izwe ukuba uMlotshwa wacina esevuma ukuthi wayitshontsha ifoni, okuyilapho abasolwa abamhambisa khona emapholiseni, enkambeni yeBulawayo Central.
UMlotshwa wavalelwa esitokisini ngecala lokumangalelwa ukutshontsha. Kodwa, kuthe esekhitshiwe kubikwa wamangala ukuthi utshayiwe. Amapholisa avula icala ngokuphangisa kwabotshwa amadoda amane la.
