KULESELA lenkomo ebeselihluphile esigabeni seGwamba eNkayi elihlangane lembila zithutha nanko phela izakhamizi zilithelele zalitshaya andubana zilibophele esihlahleni zaqhubeka zilitshaya laze lafa.
Isela leli uCanaan Ncube kubikwa ubanjwe yizakhamizi zakule indawo ngoLwesibili emini zisithi sezikhathele ngokutshontshelwa nguye kungakho zifuna ukumfundisa isifundo.
UMthunywa uzwe ukuthi uNcube ubelesandla okokuthi ubengakhethi ukuthi utshontshela bani nanko kuzwakale ukuba ubetshontshela ngitsho lezihlobo zakhe.
Stock theft
UMnumzana Thabani Nkomo oyisakhamuzi esigabeni lesi uthe ukucatsha kwenkomo besekubhahile esigabeni njalo abantu besazi ukuthi ngubani okwenzayo lokho.
“Izakhamizi besezikhathele ngokutshontshelwa inkomo okuyizifuyo eziphilisa inengi. NgoLwesibili emini izakhamizi ziqoqene zayabamba uNcube zaqala ukumtshaya zimethesa umlandu wokutshontsha inkomo zazo.
“Izakhamizi ziqhubeke zayambophela esihlahleni zambhxabula ezinye zimkhaba ezinye zimtshaya ngezibhakela kanye lezigodo. Akukho obelapho obengamtshayi, bonke ngitsho labantwana bebemthelela,” kutsho uNkomo.
Kubikwa izakhamizi zitshaye uNcube zaze zamtshiya sezibona esethe daca.
Kubikwa uNcube utholakale esefile yizihlobo zakhe elokhu ebotshelwe esihlahleni.