uMthunywa
Nkosilathi Sibanda
KULISIZINI uAriel Sibanda uvimbe igedi behluleka ukumhlohla kumidlalo elitshumi lasikhombisa.
Uqede isizini ekukhalenda yengcitshi zabadlali kuligi yeCastle Lager, wasuka lapho wanikezwa isicoco esiphezulu yiBosso Bulletin.
Phezu kwesicoco lesi eseBosso Bulletin uSibanda uphiwe inkezo lemali yeMelika i$100.
Kubo bonke abadlali beHighlanders abenze kuhle, uSibanda uphethe ephezulu ngoba kubonakele ukuthi utshengisele ubungcitshi kumidlalo lapho iqembu ebelinganqotshwa khona.
Ukuxegisa kwemvimbi zaleliqembu kumidlalo edluleyo bekutshiya lunozinti esegcekeni kodwa wenelise ukudanisa izitha ngokuvimba ibhola entanjeni.
Iphephandaba likazulu lithole ithuba lokuxoxa lonozinti lo esanda kunikezwa isicoco seBosso Bulletin ngempelaviki obike ukuba loba eseleminyaka eminengi ekunguqu, useselawo umdladla.
“Angizitshayi isifuba ngokubamba kwami kodwa kuyangikhuthaza ukuthi ngenze ngcono kwelizayo,” kutsho uSibanda owaba ngumdlali oyingcitshi ukwedlula bonke njalo ngesizini ka2016 lo2017.
Lapho athola khona isicoco ubonga abalandeli beHighlanders ngomsebenzi abawenzayo wokukhuthaza abadlali.
Okunye okunikeze umdlali lo inhlonipho yikuthi wenelisa ukubamba imbekwa eminengi kumidlalo yeligi.
Inkezo le ibiceciswe ngomfanekiso wakhe.
Isikhulumi seBosso Bulletin uMojalefa Mokwele uthe ukunamathela kuka-Ariel yikho okumenze wathola isicoco.
“Wenze kahle kulisizini njalo siyathaba ukukunikeza lesi isicoco ngendlela yokubonga umsebenzi wakho.”
