uMthunywa
Ethel Ncube
KULAMASELA amane eGweru atshonelwe lilanga ngemva kokubanjwa ngamapholisa elempahla ezitshontshiweyo ezibiza imali engangeUS$15 168.
Abetheswacala abathi uTanaka Masunda oleminyaka engu- 23 yokuzalwa, Decent Muzango oleminyaka engu-26 yokuzalwa, Lucia Masunda oleminyaka engu-40 yokuzalwa kanye loTalent Ngwenya oleminyaka engu-18 yokuzalwa betheswa amacala okutshontsha behlome ngesibhamu kusukela ngenyanga kaMbimbitho nyakenye kuze kufike khathesi.
Amasela la kubikwa abetshontsha impahla ezigoqela ama-solar, omabonakude, ingubo, omakhalekhukhwini, impahla yemkulwini konke obekubiza imali engange $15 168 loba kutholakale eye-US$11 550 lapho abahlala khona.
Bathethwe ngamapholisa
Kuzwakale ukuba impahla lezi zatshontshwa emalokitshini agoqela eMutapa, Harben Park kunye le-Athlone lapho akade begqekeza behlomile.
Isikhulumi samapholisa eMidlands, uInspector Emmanuel Mahoko uveze ukuba ubonga uzulu ngokusebenzisana labomthetho.
“Sibonga uzulu ngokusincweba indlebe ngezenzo zabane laba. Sibonga njalo labacubunguli beCID eGweru ngokusukumela phezulu ukuthi bachwayisise ngendaba le.
“Sicela ukuthi labo abagqekezelwa emzini yabo batshontshelwa bafike enkambeni yamapholisa bazokhangela impahla zabo. Amapholisa acela ukuba ongabe elolwazi ngabanye abetheswacala abathi uKnowledge Tshuma oleminyaka engu-20 loSylvester Mashoko oleminyaka engu-27 bazise amapholisa aseduzane labo.
