uMthunywa
IMPILO yalamuhla isiyehlukene lempilo yayizolo, khathesi uzwa ontanga bethi siphila ku-21st Century, lapho okunengi empilweni yabantu osekuguquke khona. Sekusebenza ithekinoloji kakhulu, sekuphilwa ngokuntinya ntinya inkinobho zabomakhalekhukhwini lamakhompuyutha.
Umakhalekhukhwini angenza imisebenzi eminengi uhlezi ndawonye okufana lokubhadalela amanzi kamanisipala, ukubhadala amagetsi ungazange uphume endlini. Kodwa abanye abantu abakuboni kulusizo njalo kulinyathelo elihle eliletha impucuko.
Ngikhumbula omunye umngane wami ongasekho emhlabeni kwakungela muntu owazi i-password yakhe kamakhalekhukhwini lemuli yakhe, umkakhe labantwana babengayazi ngitsho sibi sikamakhwapheni wakhe laye wayengayazi. Kwathi ngelinye ilanga evela emsebenzini njengomuntu owayelomkhuhlane weBP letshukela wathi efika endlini ehlala esofeni waqala ukuphela amandla eginqa etshengisa ukuthi umkhuhlane usumhlasele njengomuntu owayehlala emapulazini omakhelwane bayabe bekhatshana imuli yakhe yazama ukuthi imthele ngamanzi bebona eginqa.
Babenakana ukuthi mhlawumbe uyatshiselwa kuzakuba lobubelo, unkosikazi wayelokhe ezama ukuntinyantinya inkinobho zikamakhalekhukhwini womkakhe efuna ukubiza i-ambulensi ukuthi imgijimisele esibhedlela kwehlula ngoba umakhalekhukhwini wayelokhe esithi kayisiyo i-password waze wadela.
Wacabanga ukuyabiza umakhelwane ukuthi azotshayela imota yomkakhe bamphuthumisele esibhedlela kwatholakala lemoteni lakho kufuneka i-password ukuthi ivulwe.
Ngalelolanga kwakungela makhalekhukhwini owayelomlilo ngoba kwakutshone kungela magetsi. Kuthe lokhe besathithibele sebesangene lamakhanda becabanga ukuthi bengenzenjani wabe layela umuntu wathi salani.
Mhlawumbe aluba babesazi i-password yakhe wayezasila, engxenye ngabe usawadla amabele. Zihlobo labangane asingabi lemfihlo ezizathwalisa abaphilayo nzima. Ayixabene.
