uMthunywa
BABULALA abantu babaqume amakhanda, bese bawatshatha begijima lawo emphakathini. Bangena emizini yabantu kungcwatshwa, batshaqe amabhodo badle kwasani. Lokhu kutshiwo lilunga lomphakathi.
Lezi ngezinye zezinto okuthiwa zenziwa ngamaqembu ezigebengu azibiza ngamaLast Warning lamaJuveniles Osizweni, eNewcastle.
NgoLwesihlanu olwedlule kuthiwa isimo besisibi kakhulu kangangokuthi kuze kwaphoqeleka ukuba otitsha baphangise bakhiphe izingane ezikolo, njengoba kuthiwa bavele bavuka embhejazane.
“Lezi zigilamkhuba zidlange kakhulu eBhareni lasePlaza. Ziphatha ocelemba. Kuleli sonto zithukuthele kakhulu, zigenca kwasani ezihlangana layo endleleni. Zicasulwe ukuthi kubulawe abaholi bazo. KumaLast Warning kubulawe oyedwa kwathi kumaJuveniles kwabulawa ababili ,” kutsho ilunga lomphakathi.
Esinye isakhamuzi sithe “Bangena emingcwabeni baqukule amabhodo bahlale phansi badle, abasemngcwabeni basale benkemile . . . Babulala abantu babaqume lamakhanda bagijime lawo sibuka . . . kunzima sesifisa lokuhamba endaweni”.
Omunye umthombo uthe kuhluleke ngitsho sekubizwe amapholisa lamasotsha kodwa lezi zigcwelegcwele ziyaqhubeka zihlukumeza umphakathi.
“Namhlanje labafana bahlule, bagolozela amasotsha lamapholisa ngaseQophamlando emzini wenye indoda engeke ngiyigagule.
“Le ndoda sengathi ayizwani kahle lalaba bafana futhi bekukhona loshay’sbhamu. Laba bafana bebezama ukutshisa umuzi wendoda ngenhlanhla kwasheshe kwafika abezicitshamlilo.”
Lo mthombo uthe laba bafana bancane kodwa iNewcastle, bayiphethe isentendeni yezandla zabo.
“Sifuna kungenelele amapholisa eSAPS. Uma behluleka siyazingenela emakubo alabafana,” kuphetha umthombo obhale kuFacebook yabantu baseNewcastle.
Okhulumela amapholisa KwaZulu-Natal, uCaptain Nqobile Gwala, ukuqinisekisile ukuthi kulamaqembu amabili ayimiluthwa yewunga endaweni ahlale ehlome eyizingovolo ngemimese.
“Kube lomhlangano wabazali babo obizwe ngamapholisa ukudingida lolu daba. Akukho cala noma isehlakalo esibikiwe. Amapholisa ehla enyuka endaweni ukunqanda izigebengu,” kuphetha uCaptain Gwala.
UKhomishana wamaPholisa kuzwelonke, uGeneral Khehla Sitole uyalwazi lolu daba. Egcina ukuphawula ngalo wayethe bazolisukumela udaba lwaseNewcastle ngoba selufikile emadlebeni abo.Wathi balinde nombiko ogcwele emapholiseni akulesi sifundazwe. —Ubulembu
