uMthunywa
YiNtatheli kaMthunywa
ZIBAKHALELE izankosi amadoda amane akoBulawayo abanjwe ngamapholisa etshwathike uphondo lukabhejane ngaphansi kwesofa.
Amapholisa akoBulawayo aveze ukuba mhlaka 12 Mfumfu abopha uMpumelelo Moyo oleminyaka yokuzalwa engu-44, labanye bakhe uBongani Akim, Zwelibanzi Gazi loMbonisi Ndlovu.
“I- ZRP iyakubika ukuba kwabotshwa uMpumelelo Moyo (44), Bongani Akim, Zwelibanzi Gazi, loMbonisi Ndlovu ngokutholakala belophondo lwenyamazana egciniweyo.
“Abasolwa laba babanjwe belophondo lukabhejane eSouthworld, olungaba yi-20 centimetres ubude olulesisindo se- 6, 5kgs njalo lubiza iUS$120 000,” kutsho umbiko wamapholisa ngaleli cala.
Isikhulumi samapholisa elizweni lonke uAssistant Commissioner Paul Nyathi uthe asemanengi amacala wokubulawa kwenyamazana ezigciniweyo.
“Njalonje sikhuthaza abantu ukuthi ukubulala inyamazana ezigciniweyo kulicala. Amapholisa azaqhubeka esenza umsebenzi wawo ukuze siqedelane lezigilamkhuna lezi ezifuna ukubhidliza umkhonomi.”
U-Ass Comm Nyathi uthe okwamanje amapholisa eZRP aphezulu kokuqondisa umkhankaso wokuqeda ukubulawa kwenyamazana zasendle ngaphansi kwendikimba ethi #NoToPoaching.
