uMthunywa
Nkosilathi Sibanda
IZIKOLO sezikhuthazwe ukuthi zilungisise inkundla zazo zomdlalo wokugijima ngoba phela abafundi bazancintisana kulumdlalo.
Inkuthazo le, iza ngesikhathi inhlanganiso yeNational Association of School Heads (Nash) ibeka isimemezelo sokuthi sekuvunyelwa ukuthi kube lemincintiswano.
National Association of School Heads
Kusukela ngethemu yesibili ngomnyaka ka-2019, izikolo bezimisiwe ukuthi ziphatheke kwezemidlalo, kulandelwa izinqumo zokwehlisa ukumemetheka kweCovid-19.
Covid-19
Imizamo yokuthi imidlalo iphendukiswe ngomnyaka odluleyo yehlule, nanko izikolo bezisephula imithetho yokuhlanzeka.
Kodwa, injabulo isiphendukile ngoba, ngokuvulwa kwezikolo ngoMvulo kuliviki, inhlanganiso yeNash ithe izikolo sezivunyelwe ukuthi ziqale imidlalo etshiyeneyo.
Umkhokheli weNash, uArthur Maphosa uqinisekise lokhu ngoLwesithathu ekhuluma lentatheli yephephandaba likazulu.
“Sebengaphenduka enkundleni abantwana,” kutsho uMaphosa.
“Ngemva kwesikhathi sikhankasela ukuthi imidlalo iqalwe, kuyajabulisa ukubika ukuthi lonyaka sithi azivulwe inkundla, abafundi bancintisane.”
Kulesi sigaba somnyaka, izikolo, ikakhulu ezikaZulu ezikhokhelwa nguHulumende, ziphakathi kwamalungiselelo omdlalo wokugijima.
Kodwa ngenxa yokuthi inkundla sezigcwele ukhula, izikolo zikhuthazwa ukuthi zicente, zilungiselele kakuhle.
Zinengi izikolo ezisemalokitshini lapho inkundla zemidlalo eseziphenduke amahlathi ngenxa yokunganakekelwa.
Loba kubhadaliswa imali yezemidlalo, kuyadanisa ukuthola ukuthi bakhona abaphathi, abazali lababalisi abehluleka ukugcina inkundla zikusimo esifaneleyo.
“Inkundla azilungiswe kuhle ukuze abantwana bathole indawo yokuthi bancintise ngokupheleleyo, langendlela ezaphakamisa amathalenta abo,” kuxwayisa uMaphosa.
Ngaphandle komdlalo wokugijima, lonyaka abafundi bazakhuthalela ukuncintisa lakweminye imidlalo.
Bakhona abaqala ibanga lika-Fomu 1 ngo2019 kodwa abakaze bathole ithuba lokuzibonakalisa esikolo.
Kunguqu, izikolo zilindele umqhudelwano we-Copa Coca-Cola, kwezokuqaga kuzancintiswana kuStella
Tanganda leminye elosekelo lwemali.
Kungumbono womunye umqeqetshi wezemidlalo ezikolo zakoBulawayo ukuthi lesi yisikhathi sokuthi izikolo zincedise abantwana abale siphiwo kwezemidlalo.
“Abanye abantwana baqede isikolo bengazange balugxobe enkundleni. Balahlekelwe ngamathuba empilo lapho. Njengabaqeqetshi lababalisi, akube ngumsebenzi wethu wokunikeza abantwana ithuba, labo bavumbulule kumbe bavuselele amathalenta,” kutsho uThokozani Sibalo, oqeqetsha umdlalo wokugijima.
Ukuvulwa kwenkundla zemidlalo ezikolo kube zindaba ezinhle kunhlanganiso zemidlalo elizweni.
