uMthunywa
Bongani Ndlovu
KUTHI huu! Kubalandeli bonke abomdlalo kanobhutshuzwayo kulandela ukubizwa kwabadlali beqembu lamaWarriors abazagijima elizweni likaPharaoh ngenyanga ezayo lengcitshi zeAfrica kumqhudelwano weAfcon ka2019.
Iphephandaba likazulu likhulumisane loThomas Sweswe loHerbet Dick ababengabadlali bamaWarriors ngaphambi kokuba bathathe umhlala phansi eqinjini elikhulu lesizwe ngemva kokuba bethole ithuba lokuyadlala lengqwele zeAfrica kumqhudelwano efanayo yeAfcon.
Ekhuluma lephephandaba likazulu uSweswe uthe ufisela abafana bakhe inhlanhla kweleGipite ngoba kungelula.
“Ngithanda ukufisela ama-Warriors inhlanhla emdlalweni yabo yeGipite ngoba ukudlala lumdlalo yeAfcon akukaze kwabalula njalo ngithanda ukuthi babelokuzethemba njalo bakwazi ukuthi bamele isizwe esibalandelayo njalo esiziqhenya ngabo,” kuveza uSweswe.
Uqhubeke waveza ukuba umqeqetshi ulenhloso ngabadlali ababizileyo ukuthi bazogijima bemele iqembu lesizwe kumdlalo ye-Afcon.
“UMhofu uyakwazi akwenzayo yikho ekhethe abadlali abakhethileyo thina sekufanele sithembe umqeqetshi labadlali bakhe ngoba sifuna ukuthi lonyaka sithole ukuyadlala kuma-Quarter finals kumbe i-final ngoba silabadlali abamangalisayo,” kuchaza uSweswe.
UHerbert Dick yena obengela amanengi angawatsho uthe ufuna ukukhumbuza abafana bamaWarriors ukuthi labo bayizilwane kulomqhudelwano ngakho kazibotshwe zihlasele.
“IZimbabwe layo njengawo wonke amaqembu aku-Afcon bayizilwane ngoba labo batshona bekhona kule imidlalo lapho amaqembu ase-Africa abizwa ku-Afcon kusukela kudala akumangalisi ukuthi lawo amanye amaqembu ayethukile njengawo ama-Warriors.
“UMhofu ungumqeqetshi ololwazi owaziyo akufunayo kubadlali kungakho ukhethe abadlali abona engathi bengasidlulisa kusigaba sokuqala,” kuchaza uDick.
