Ayihlabi Ngakumisa: P Ndebele

13 Dec, 2018 - 00:12 0 Views

uMthunywa

Silo C Dube kugwalo
UNKOSIPHILE (uNkosi) usesiphiwe isithupha sakhe sesibili lapha esikolo seSir Humphrey Gibbs. Lesi esesibili ngesokufuya inkukhu. Njengomuntu owenze kuhle ezifundweni zakhe, iZim Care inhlanganiso ebona ngabantwana abathathela khatshana izifundo zabo, iyaqhatsha abantu abanjalo. UNkosi laye sekufike isikhathi sokuthi asuke lapha bakhetha ukumqhatsha abakhulu besikolo lepulazini yeZimCare leyo.

Njengomntwana uNkosi angeke azenzele isinqumo sokuthi asebenze kumbe engasebenzi lapho. Kumele aqale azise abadala ezwe kumbe bayavuma. Umzali wakhe wokuqala owamazisayo ngunina omncane uNothando ngoba nguye ayehlala kuye edolobheni. Weza unina omncane wazokhuluma labakhulu besikolo sikaNkosi bebonisana ngecebo lokuthi uNkosi ahle aqatshwe epulazini. Babemesaba abaphathi besikolo ikakhulu uTshili onguye owasebenza loNkosi mayelana lokungaphatheki ngokusala kukaNkosi esikolo nxa zivalwa abanye besiya emakhaya.

Sebebonisene unina omncane kaNkosi, uNothando, labaphathi bakaNkosi, bahamba oNothando lomkakhe uVundla bayabikela abazali bakaNkosi ngalelocebo. UMaNdlovu wahle walemukela lelocebo ngoba wayevele elesifiso ukuthi uNkosi aluba uyahlala labangane bakhe besikolo oMartin. Wathi nxa kunjalo kawuthathe lowo msebenzi uNkosi. Uyise, uSwabide Khumalo, wayengavumelani lalelocebo yena efisa ukuthi uNkosi abuye ekhaya azofuya inkukhu engekhaya.

UKhumalo wayesemenzele amalungiselelo wonke wathenga lezitina zokwakha izilugu zenkukhu. Wakhala ngamandla akhe uKhumalo ayesephelele emoyeni. “Yeka amandla esambane esagebha umlindi asawulala.

Lithini-ke ngamalungiselelo wonke la esengiwenzile? Asephenduke ize leze.” UNothando wamqinisa usibale wakhe ngokuthi kuzakuthi ngezikhathi zakhe zokuphumula ekhona ekhaya, abasize ngokuqhuba leyomisebenzi abefuna ukuthi azoyenza. Wayaphambili ethi ngesikhathi uNkosi engekho bazadinga isisebenzi esizawenza lowo msebenzi.

Wathi uKhumalo kamvumele uNkosi ayethola leyo ekisipiriyensi. Wavuma uKhumalo, uyise kaNkosi ukuba wayesedliwe yivoti. UNothando wabonga umkhwenyabo, uKhumalo wabaqinisa ethi bengesabi, uzasebenza uNkosi. UNkosi watshelwa nguyise omncane uVundla ukuthi ngokunjalo bavuma abazali bakhe ukuthi awuthathe umsebenzi. Kwavunyelwana ukuthi kwenziwe idili lokwenzela uNkosi amhlophe. Lelodili lalizabakhona ekupheleni komnyaka. Loludaba lwedili selusibisela kukwehlukana phakathi kwenkolo lapha koKhumalo.

UKhumalo ukholwa esintwini kanti ngakwelinye icele uMaNdlovu ukholwa kusiKrestu, emkhulekweni hatshi emadlozini njengoKhumalo. Ngenxa yenkolelo zikaKhumalo ababezanxuswa babezakhethwa ngonanzelelo.

UNkosi uthi uyise, uKhumalo wathi kafuni ukunxusa labathakathi. Kodwa seluxoxwe kabanzi lolodaba kuthiwa uKhumalo wacina evuma ukuthi kunxuswe uwonke lowonkana. Bexoxa ngedili likaNkosi ekulaleni uKhumalo uthi kuMaNdlovu:

“Uyazi, MaNdlovu, ayaxega amabhulugwe nxa ngicabanga ngokungahle kwenzakale emdlalweni womfana.”

UMaNdlovu uyambuza uKhumalo ukuthi okunjengani okungaze kwethuse indoda engangaye. Wamqinisa ethi kabambe uvalo njengoba wayezabe ekhona uNdiweni, njalo kwakukuhle ngoba wayezakhuleka izinto zibahambele kuhle. Waqhubeka ethi ababebahleka babezawaginya amagama ababebafisela ngawo okubi.

Ukutshengisa sobala ukuthembela kwakhe kuNkulunkulu uMaNdlovu. UKhumalo ukuphendula ngalamazwi lokhu: “Lokho okukaNdiweni ngiyakubona. Umthandazo yinto ethi ifakwa umuntu wonke azi ukuba sekukhothanyiswa amakhanda. Phela bazabe bekhona lababi kusasa phakathi komuzi wami befuna ukusisozisa. Bazabuya befumbethe izinto ezingalunganga ezingahle zilimaze umntwana thina abanye silokhu sikhothamise amakhanda kuthandazwa.”

Kusobala ukuthi uKhumalo uyazikholwa izinto zobuthakathi. Zwana okulandelayo kusigaba esilandelayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds