uMthunywa
C Dube
SESITSHENGISILE ngamafitshane ukuthi sitshoni ngamafitshane isaga esithi: “Ayihlabi Ngakumisa.”
Lokho obona angathi ulutho oluthile luyikho akuvamanga ukuthi lube ngaleyondlela.
Sikubonile kulolugwalo ukuthi uNkosiphile wayekhanya eyisilima esingaphezu kwazo zonke njalo engasoze enza lutho empilweni yakhe.
Kanti labo ababecabanga njalo babetshaye eceleni.
Nango uNkosiphile esenza izimanga esikolo lapho ayefunda khona ethola izicoco ezenza ukuba aqatshwe ekucineni kwakho konke.
Umbuzo esingawo lamhlanje yikuthi kambe umlobi uphumelele na kunjongo yakhe yokutshengisa ukuthi “ayihlabi ngakumisa”. Ubutshengise kuhle na ubulima bukaNkosi?
Ekuzalweni kwakhe uNkosi izalukazi leziya uMaKhuphe loMaNsingo ezabelethisa uMaNdlovu zazibone umhlola omkhulu. Ngokubona kwazo uNkosi wayengamelanga aphile.
Ngokubona kwazo zazibone inyamazana, into eyesabekayo eyayingamelanga iphile.
Ngesiko lakudala kwakumele uNkosi ahle aklinywe afe ngoba ezaba yinto eyesabekayo.
Unina uMaNdlovu wala ukuthi usane lwakhe lubulawe ethi kumele aphile umntwana kanti loyise uSwabide Khumalo wayezatshaya phezu kwamazwi akhe ethi uzaphila umntwana lanxa wakutsho lokho ngemva kokucabangisisa kakhulu ngalolo daba.
UMaNdlovu wahle watshengisa ukuba likholwa eliqinileyo elikhonza uMlimu ngoba watshela izalukazi leziya ukuthi uMlimu nguye yedwa zwi osaziyo isizatho esasimenze umntwana onjalo.
Wathi uyasamukela isipho esasivela kuye uThixo.
Waqhubeka uMaNdlovu ukuthi nxa kwakungabe bembulala umntanakhe kungakhathalekile ukuthi babekwenza lokho bevumelana loKhumalo yena wayeqonda eRoma emapholiseni.
Sisizwa lokho kuthiwa sakhwaza sikhuza imihlola isalukazi esinguMaKhuphe sesibaba silibilebile.
Sizwe-ke ubulima bukaNkosi ngokuvezwa nguMaKhuphe ebuza uMaNdlovu:
“Ngiyabuza-ke, fanami. Ngumntwana yenalo ongaze utshone usimbuluzela ngaye? Into elamehlo aphambeneyo njengawonwabu lekhanda eliyisizemazema elinje?
Mane usuke lapha! Ucabanga ukuthi yena uKhumalo uzacabangani ngathi nxa sizakuthi sibadala singaka sekele into enje iphila ize ibonwe ngumhlaba wonke jikelele?
Kuyahlola okunje. Kuzakuchithela umendo, sithuthandini.
Yekela sikusize, mntwanyana, sikuklinye okuyinto lokhu, sikuthathe siyekuhloma emhomeni kudliwe ngamagenga. Lawe uzasala uzitshayelwa ngumoya.
“Nxa usafisa ukuzama njalo ukuzala, uzaphela uzame mbayimbayi, kodwa thina, ngicela ungaphindi usibize futhi uthi sizokubelethisa. Sesibone kwanela.”
Lanxa singanxwanelanga ukuhlaziya izimilo zabalingiswa, kodwa ingxenye esiyicuphileyo yogwalo iyasitshengisa ububi bukaMaKhuphe loMaNsingo.
Babelomoya wobuthakathi ogogo laba lanxa besenza angathi bagcwalisa isiko lesiNtu.
Icebo abafuna ukulenza lapha libi kakhulu njalo lenza ofundayo abelombuzo ukuthi kambe bangaki abantwana okwakumele baphile abafa ngalindlela.
La amasiko kumbe imikhuba enje ngeminye emele ilahlwe nxa abantu besamukela impucuko.
Buvela kuhle na ubulima bukaNkosi? Qaphela mfundi ukuthi khona sizalutshukatshuka lolu daba.
