uMthunywa
C Dube
“AYIHLABI ngakumisa.” Asikafiki kusibanga lapho esingathi sesitshaye kwazwela ngogwalo lwethu lolu, “Ayihlabi Ngakumisa.”
Ikakhulu nxa sizama ukuzwisisa sona sitsho lesi esithi, ayihlabi ngakumisa.”
Kunengi okusamele sikutsho ngaloludaba.
Ngubani obesazi ukuthi isilinyana sakoKhumalo singaphumelela kangaka ezifundweni zaso size senzelwe idili elingaka elihanjelwa nguzulu ongaka.
Kuviki ephelileyo siphethe ngamazwi kamphathisikolo lapho obekufunda khona uNkosi, uTshili obemele yena umphathi wakhuluma amazwi amqoka eveza ukuthi bona isifiso sabo yikuthi abantwana ababafundisayo bangapheleli kuyo iZimcare.
Wathi bafisa ukuthi imfundo ibavulele amasango emisebenzi njengabo bonke abantu abafundele imisebenzi.
Waphetha inkulumo yakhe uTshili ngokubacela bonke ababelapho ukuthi nxa ekhona owazi izindawo ezifuna izisebenzi ezithembekileyo zokulima imibhida, ukufuya inkukhu, ukugoqa amakhothihenga lokunye okunjalo, kathintane labo eZimcare.
Isibuyele kuVundla, uyise omncane kaNkosi, inkatho yokuthi akhulume waphendukela ngakuNkosi, umnikazi wedili.
Wathi balitshayela ihlombe ijaha lakoKhumalo. Waqhubekela phambili esithi bamkhokhele oyisemkhulu, asebenze agcine imali abe yindoda.
UVundla wamkhumbuza uNkosi ukuthi angalibali ukuhlonipha ayezasebenza labo.
Wagcizelela ethi lokhu kuzakwenza labo bamhloniphe laye uNkosi.Waphetha ngokumxwayisa ukuthi agcine umsebenzi uNkosi.
Sezikhulumile izikhulumi kwafika isikhathi sokudla.
Nxa ekuchaza lokho, uNkosi uthi idili lelo lalenziwe ngumninilo.
Uthi inyama bayidlithiza abantu. Yaze yadliwa layizinja.
Labomangoye bawaxolela amagundwane etshikiza okuyimsidlana ethangweni.
Bawaxolela nje ngoba kuchaphakele ukudla ekhaya.
Uyalulandisa udaba lwakhe uNkosi ethi wayesekhulile. Isigodi sonke sasesingakufakaza lokho. Wayesesiyaqala ukusebenza.
UNkosi uphindaphinda amazwi kayise, uSwabide Khumalo, owayethe kumele afunde aginye amaphepha.
Wayesewaginyile amaphepha njengokutsho kukayise.
Wayeseyisifundiswa uNkosi. UNkosi upha umbono wakhe mayelana lokutshiwo ngabantu.
UNkosi uveza ukuthi abanye abantu bacabanga ukuthi abantwana abanjengaye ngosikhangezile okwempilo yabo yonke.
Nxa esithi abantu ngosikhangezile utsho abantu abaphila ngokuphiwa uncedo ngabanye abantu bengafuni ukuzisebenzela.
UNkosi uthi uyakwala lokho ukuthi abantu abanjengaye ngosikhangezile abamelela ukuphiwa.
UNkosi yena ngombono wakhe uthi okuqakathekileyo yikuthi abantu abanjengaye kumele baphiwe amathuba.
Uthi bafuna ukubekezelelwa ukuze bafunde. Bayafunda basebenze.
Yena uNkosi uthi ufisa ukuthembeka emsebenzini ukuze avulele oMbonisi amathuba okuthi labo baqhatshwe.
UMbonisi lo oqanjwa nguNkosi ngumngane wakhe ababefunda bonke eZimcare.
UNkosi uthi akumjabulisi ukuthi abangane bakhe laba baguge behlala eZimcare.
Uyayibonga kakhulu iZimcare uNkosi. Ngeqiniso, “Ayihlabi Ngakumisa.”
