Ayihlabi Ngakumisa

28 Feb, 2019 - 00:02 0 Views

uMthunywa

C Dube

AYIHLABI ngakumisa. Ulutho kaluze lwaphuma njengalokho olukhanya luyikho. Lokhu kuvela sobala kuNkosiphile Khumalo indodana kaSwabide Khumalo uMphathisikolo wesikolo seTotololo, emzala lomkakhe uMaNdlovu.

Sikhumbuzene ngeviki ephelileyo ukuthi uNkosiphile wayezelwe eyisilima esesabekayo okwenza waphosa wedluliswa kulandelwa isiko lakudala.

Usane olwaluzalwa lungaqedakali kwakuthiwa ludluliswe khonokho nje lusanda kuzalwa.

UNkosi wasilela ukwala kukanina ukuthi abulawe. Siyakhumbula ukuthi uKhumalo lanxa wayethe umntwana uzaphila kuzalukazi leziya ezabelethisa uMaNdlovu wayengakutsho ngenhliziyo yakhe yonke.

Simbonile uKhumalo ezama ukuyedlulisela ingane le ayeseyithi ngumntakaMaNdlovu. UKhumalo wayefisa lokhu ngoba wayethi kumkhipha isithunzi njalo kwakuyimisebenzi yabantu abamzondayo yokuthi kuzalwe umntwana oyisilima emzini wakhe.

Kwabanzima ukuthi akwamukele lokho uKhumalo loba nje wancibilika ngemva kwesikhathi.

Wakhula uNkosi etshengisa ukuba lobugoga uKhumalo efisa ukuthi afihlwe kumphakathi engaze wabonwa ngabantu.

Kodwa okumiswe ngoPhezulu, uNkulunkulu akufihleki. Unina kaNkosi, uMaNdlovu, wayemtotoza kakhulu umntanakhe engakholwa ukuthi angazenzela ulutho.

Ngenye imini uKhumalo esele laye uNkosi ngekhaya wathi uyamthuma wala uNkosi.

UKhumalo waluthatha uswazi watshaya uNkosi emfundisa umthetho wokulalela nxa ethunywa.

Wabaleka uNkosi eqonda lapho unina aye eyekhona. Lanxa uMaNdlovu kwamzondisa lokho kodwa kwahle kwenza uNkosi wafunda ukulalela nxa ethunywa lokwenelisa eminye imsebenzi eyayimlindele.

Kwaya waze wayadingelwa indawo yesikolo eSir Humphrey Gibbs esingaphansi kweZimcare. Esefunda eZimcare uNkosi watshengisa ukuhlakanipha okukhulu.

Nxa elandisa udaba lwakhe uNkosi ukhanya yena wayebambela phambili izinto kusukela ekufundeni ukuzidlela bodwa lokuzendlulela imibheda abalala kuyo lokuhlanza izindlu zabo nxa siqamba nje okulutshwana Ekufundeni lakho watshengisa ubungcwethi uNkosi.

Wayebedlula abanengi afunda labo. Eseqedile wathola izithupha. Nxa singabuyela emuva kancinyane uNkosi wahle watshengisa ukuthi yena wayengasosilima lesiya esehluleka ukuzenzela izinto ngoba sibona evakatshela unina omncane owayehlala elokitshini eyedwa kungela ohamba laye.

Esenze izifundo zakhe kanye lokufuya inkukhu wenzelwa idili lokuphumelela njalo eseqatshiwe ukuthi ayencedisa uTshili ukufundisa abanye abantwana uyayiphetha uNkosi indaba yakhe ngokusilandisela okwenzakalayo.

Uqala ngokusitshela ukuthi wayesekhulile uNkosi. Isigodi sonke sasesingakufakaza lokho. Wayesesiyaqala ukusebenza.

Uyise wathi wayeseginye amaphepha njengokutsho kwakhe. Uyagcizelela uNkosi ethi wayeseyisifundiswa.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds