uMthunywa
C Dube
AYIHLABI ngakumisa ngempela. Yini le ehlabayo kumbe engahlabiyo? Lo umbuzo sizawutshiyela elinye ilanga ukuze siwuphendule.
Sesiqamba lesi sihloko sogwalo ngoba besilokhu singasiqedisisi ukuthi sitshoni, kodwa nxa sesibala emaphethelweni ogwalo sekukhanya ukuthi sitshoni lesi sihloko esizwakala siyisaga nje.
Ukusiveza kuhle ukuthi sitshoni isaga esithi, “Ayihlabi Ngakumisa”, sizabuyela emuva kancane siyilandisa kakutsha indaba yokuzalwa kukaNkosi.
Siyakhumbula, nxa silandela umbono wabogogo uMaNsingo loMaKhuphe ekuzalweni kwakhe uNkosi kwakuyinto engaqedakaliyo, isilima okokuthi ngesiko lesintu lakudala umntwana owayezelwe engaqedakali kwakumele aklinywe abulawe kube yinto ezelwe ifile.
Ogogo engibaqambe ngaphambili ngokwazi kwabo uNkosi wayezelwe eyisilima okwakungamelanga siphile.
Bakutsho lokho kodwa unina uMaNdlovu wala lokho wathi uzaphila umntanakhe. Umkakhe uSwabide Khumalo kwakungathi uyifundile ingqondo kaMaNdlovu ngoba wathi etshelwa ngogogo labaya endaweni yokuthi avumelane labo ukuthi umntwana abulawe yena wathi uzaphila uNkosi.
UNkosi wayezelwe eyisilima esesabekayo okwenza uKhumalo, uyise kaNkosi wabanika imbadalo yokuthi bavale imilomo bengahambi befafaza ukuthi kwakuzelwe isilima ngakwakhe.
UKhumalo wavala imuli yakhe ukuthi ingayi eSontweni ngoba abantu babezabona ingane eyayisilima.
Inkosikazi yakhe uMaNdlovu yona yake yavalelwa endlini kuthiwa ingabonwa ngabantu. Abantu babetshelwa ukuthi kakho ekhaya uMaNdlovu waya kibo, ehambele umkhuhlane.
UKhumalo wayengasakhululekanga. Wayengamphathi umntwana sekungathi ngokaMaNdlovu yedwa.
Babekubona lokhu abanye abantwana bakaKhumalo. Wabatshela uKhumalo ukuthi bangalokothi bayikhulume indaba yomnawabo esikolo. Waphuma uKhumalo wayadinga inyanga okuthiwa nguMahaqaza.
Wayephumele ukuyadinga umuthi wokuthi abulale ingane yakhe le eyisilima eyayisimyangisa ebantwini njalo wayekholwa ukuthi yayibangelwe yizitha zakhe ezazimloya.
Wenzenje uKhumalo edinga imithi yokubulala umntwana uMaNdlovu yena uqina ngomthandazo ukuthi umntanakhe aphephe kuzingozi ezimzulelayo.
Kuthi lanxa uKhumalo esenza izenzo zokuzama ukubulala usane aqine ngomthandazo uMaNdlovu imizamo kaKhumalo yehlule.
Esehlulekile ukubulala umntwana uKhumalo uyaguquka kungqondo yakhe le embi.
Uthi lanxa esesiya kunkalatha yenyanga uBharimasoso kaselawo umqondo wokubulala uNkosi.
Nxa uBharimasoso ethi engamdlulisa uNkosi, uKhumalo yena uyala lelo cebo. Wathi esephendukile ekhaya waqala ukumthanda uNkosi njengabo bonke abemzini wakhe.
Ngokuya kwesikhathi kweza amalunga eSonto yabo ezobavuselela njalo ebanxusa ukuthi baphenduke enkonzweni. Wabhabhathizwa uNkosi.
Kwafika isikhathi sokuthi uNkosi aye esikolo.
Wathola indawo esikolo okuthiwa yiSir Humphrey Gibbs lapho atshengisa ukukhalipha kwengqondo njalo wemukeleka ebantwini.
Ayihlabi Ngakumisa. Sihlangane kuviki ezayo.
