uMthunywa
ABADLALI bekhilikithi kuleli sebekhuthazwe ukuthi baqinele ukulolonga kunyanga ezilandelayo ngoba minengi imidlalo ezaqhutshwa kuqembu lama-Chevron, kutsho iZimbabwe Cricket.
Lokhu kuza ngesikhathi umdlalo wekhilikithi usubuyele enkundleni kulandela ukuphiwa imvumo evela kuHulumende ukuthi umdlalo lo uqhubekele phambili.
Iqembu lesizwe elama-Chevrons likhangelelwe ukuthi lidibane lesizwe seAfghanistan le-Pakistan phakathi kukaMbimbitho loMabasa. Inhlanganiso yeZimbabwe Cricket ithe ngenxa yokwanda kwemidlalo ngesikhathi esincinyane, kuzamele abadlali bazimisele.
Inhlanganiso le yazise ukuthi ibilesifiso sokuthi iZimbabwe idlale lesizwe sase-Ireland kodwa kwehlula. Inikeze isizatho sokuthi akusela sikhathi sokulungiselela umbuthano lo, nanko phela imidlalo leAfghanistan lePakistan isendleleni.
Iqembu le-Ireland belifuna ukuzodlala amahlandla ayisithupha.
Isikhulumi seZimbabwe Cricket uDarlington Majonga ubike ukuthi umdlalo lesizwe se-Ireland wedluliselwe phambili.
UMajonga uthe ayisikho ukuthi lumdlalo umiswe yiCovid-19.
“Abadlali bethu sikhuthaza ukuthi bazimisele ngokulolonga kulandela ukuhlala isikhathi eside behleli. Ngokunjalo, iZimbabwe Cricket ibika ukuthi umdlalo wethu lesizwe se-Ireland wedluliselwe phambili.
“Lokhu kungenxa yokuthi kulemidlalo ekhona phakathi kwesikhathi. Ukwedluliswa kwalumdlalo akulani leCovid-19,” kutsho uMajonga ngoLwesibili.
Inhlanganiso yeZimbabwe Cricket ibonge uHulumende ngokuvumela ukuqala kwemidlalo, ngokutsho kukaMajonga.
IZimbabwe Cricket kusukela ngomnyaka odluleyo ibilungisa inhlelo zayo ezibalisa olwe Bio-security olugcizelela ukuvikelwa kwabadlali kugcikwane leCovid-19.
