uMthunywa
YiNtatheli kaMthunywa
ABADLALI beqembu lama-Gems sebeqale phansi ukulolonga nanko phela isizwe sesihlose ukuyancintisa lamazwe aseAfrica kumncintiswano we-African Championships ozaqhutshelwa edolobheni le-Cape Town.
Amantombazane adlalela leliqembu atshayelwa ihlombe phakathi kwalumnyaka ngokuphumelela ukuyancintiswa kumidlalo yeVitality World Cup.
Kulumncintiswano we-Africa, iZimbabwe izadibana lamazwe ayisithupha abalisa iSouth Africa, Uganda, iBotswana, Kenya, Malawi leZambia.
Inhlanganiso yeSports and Recreation Commission ibike ukuba izasekela amantombazana esizwe ngakho konke okungafunakala belungiselela imidlalo le. Amehlo azathi nhlo kuliqembu kulandela ukumangalisa inengi ngokufika kunkezo yomhlaba.
Umqeqetshi walo uLloyd Makumbe utshele iphephendaba likazulu ukuba abakwenza kunkezo yeVitality eNgilandi yikwedlula ngoba sebedinga ukwakha imbali entsha.
“Siya eCape Town sikhangelwe njengeqembu elitshisayo ngenxa yokudlala kwethu kuWorld Cup. Lokho sikubeka eceleni ngoba umncintiswano wamazwe ase-Africa uhlukene njalo akhona amazwe adlala ukwedlula thina,” kutsho lumqeqetshi.
“Amalungiselelo akuzinga eliphezulu, silungisa amaphutha ethu ukuze siyenqoba.”
Umqeqetshi lo uthe ukuncintisa eCape Town kuzanceda ekuthini iqembu lakhe lihlangane kuhle kulandela ukusuka kwabadlali abathathu uRudo Karume, uPauline Jani loPerpetua Siyachitema.
IZimbabwe yakhutha ugatsha lokufikisa isibanga sokucina somncintiswano we-Vitality Netball World Cup.
Ukudlala kwamaGems kwaba yisimanga kulabo abangakaze babukele lumdlalo. Ngaleso isikhathi abadlali laba badonsa isikhathi eside bedlalela indlala, bengaholi lutho.
Kubikwa ukuba ngenxa yokuthi amaGems asedlala kuWorld Cup, sekulamankampani aseveze ukuthi afuna ukuba yingxenye yomdlalo wokuqaga.
Kuleli umdlalo wokuqaga udlalwa kakhulukazi koBulawayo laseHarare.
