uMthunywa
YiNtatheli kaMthunywa
IMIDLALO ye-handball iqhuba kuhle koBulawayo yiloba iswela usekelo lwemali kulandela ukwanda kwamaqembu ancintisa kulumhlubulo welizwe.
Iligi le eqalise mhlaka 12 Mpandula isilamaqembu avela edolobheni leHwange laseGwanda. Amanye amaqembu asephakathi abalisa iMpopoma Movers, Mpandeni, le-Empire Sharks.
Kuqula labafana, kuzancintisa intshantshu zanyakenye iAjax Handball Club, Bulawayo Poly, Gwanda State University, Cyrene High School, Hwange Handball Club lekolitshi leNational University of Science and Technology (Nust).
UCephas Mushati oyisikhulumi seligi le ubike ukuba kuqula lamantombazana sekubhalise amaqembu abalisa iGwanda High School, iNust, inyuvesi yeGwanda, United College of Education, Gwanda High, le-Empire Sharks.
UMushati uthe bakhangelele ukuthi umncintiswano wesizini le ubephezulu.
“Sisebenza nzima ukuthi sithole usekelo ngoba amaqembu asemanengi. Kuzafuneka njalo ukuthi amaqembu ethu adlale ngobuciko baphezulu. Iligi yethu izadlalwa kuze kufike ngoZibandlela, lokhu sikwenzele ukuthi amathimu athole isikhathi sokulolonga,” kutsho uMushati.
Kusenjalo, ngeviki edluleyo amaqembu amele izabelo zonke athe gwaqa koBulawayo enkundleni yeUnited College of Education (UCE) kudingwa intshantshu ezizabumba iqembu lesizwe.
Amathimu avele ngaphandle kwesabelo sakoBulawayo abalisa iBlack Rhinos, Manyame Falcons, Harare City, Bindura State University, Chihnoyi University of Science and Technology, City Saints, Thornhill, Hawks, Midlands State University leFilabusi.
