uMthunywa
Ethel Ncube
KULANDELA ukutholakala kwenye indoda yeTsholotsho ifile okucatshangelwa ukuba ibulewe sokuvele ukuba amapholisa asesukumele phezulu ahamba izigaba ngezigaba evakatshela izinduna ukuze axoxisane lazo ngamacala okubulalana lokudlwengulwa wona asezingeni eliphezulu eTsholotsho.
Enye yezinduna zeTsholotsho induna uGampu iveze ukuba amapholisa aqalise kuyonale iviki ukubhoda ezigabeni ekhuluma ngamacala amakhulu adalwa ngabantu.
Ekhuluma lentatheli induna uGampu ichaze ukuba iTsholotsho yonke iyakhokhela ngokudala amacala anzima.
“Okusezigabeni zethu kunzima, abantu bayabulalana, omunye utholakala esefile omabulala sebebalekile, asiselakuthula. “Amapholisa angifonele engibikela ukuba azabhoda kuzinduna zonke zeTsholotsho kukhulunyiswane ukuthi amacala la angaqedwa njani ngoba imiphefumulo yabantu isilahleka nje mahlayana ngezinto ezingelancedo.
“Lathi njengezinduna sizazama konke okusemandleni ethu ukuthi udubo lwamacala la lwehle abantu bangaphenduki inyamazana kodwa babengabantu abalobuntu lonembeza,” kubika induna uGampu.
Uqhubekele phambili eveza ukuba lamacala okudlwengulwa eTsholotsho lawo asezingeni eliphezulu.
“Okwethu kuyadanisa ngoba labantu esibathembayo ukuba bazavikela isifazane kumbe abantwana yibo abasuka badlwengule futhi kukanti amanye amacala okudlwengulwa nxa enzakala phakathi kwezihlobo ayafihlwa. Konke lokhu kumele kuqedwe, umuntu nxa onile akulani lokuthi yisihlobo, kumele aye ejele,” kuveza induna uGampu.
UMthunywa uxhumane lesikhulumi samapholisa eMatabeleland North uInspector Glory Banda oveze ukuba liqiniso ukuthi amapholisa abhoda eTsholotsho ezama ukukhulumisana lezinduna ukuze kutholakale isixazululo esizasiza ekwehliseni amacala okudlwengula lokubulala.
“Amapholisa azabe ebhoda kunkokheli zomdabu eTsholotsho ezama ukuthola amacebo okuqeda amacala okubulalana ngoba ngenyanga uthola ukuthi amacala okubulalana ayakhwela endaweni le. Sizama ukuthi uzulu atshiyane lokuqeda uhlupho alalo ngokubulala umuntu? Yindaba abantu bangaxoxisani nxa sekuthe kwabalohlupho kulokuqeda imiphefumulo?
ulnspector Glory Banda
“Okunye njalo esikuxwayisayo njengomzamo wokwehlisa ukulahleka kwemiphefumulo yabantu yikuthi nxa ulomuntu olomkhuhlane wengqondo zama ukuba umhambise ezindaweni lapho angathola khona usizo ngoba laye umuntu onjalo uyingozi emphakathini.
“Njengamapholisa sithi asitshiyeni ukulwa sihloniphe umphefumulo ngoba uqakathekile ukudlula inhlupho esiyabe sizibanga. Sihamba ematshwaleni singaba lohlupho khonale singalwi kodwa asikhulumisaneni siqede uhlupho kungela ofileyo kumbe otshayiweyo singabulalani,” kuphetha uBanda.
