Ayalimeka amatamatisi ngesikhathi somqando

13 Jun, 2024 - 00:06 0 Views
Ayalimeka amatamatisi ngesikhathi somqando

Langelihle Moyo

INHLANGANISO ye-Agritex ebona ngezokulima lokufuya isikhuthaze abalimi ukuthi amatamatisi ayalimeka ngesikhathi somqando loba nje abalimi abanengi bethandabuza ukuwalima ngalesisikhathi.

UNkosazana Treggy Mpofu oyi-Horticulture Specialist kunhlanganiso le uthe loba umqando uhlasela amatamatisi akutsho ukuba akusamelanga alinywe.

“Amatamatisi alakho ukuphanjaniswa ngumqando kodwa lokhu akutsho ukuba akusamelanga alinywe kokuphela. Abanengi abenelisa ukuthola ama-green house babawasebenzise ukuvikela izilimo ngesikhathi somqando. 

“Ukulima amatamatisi ngesikhathi somqando kuhle ngoba aba lomkambo omkhulu ngoba ayabe edingakala kakhulu, okunye njalo umlimi uzilethela inzuzo enhle ngasolesi  isikhathi.

“Abalimi abanengi bayesaba ukulima amatamatisi ngesikhathi somqando ngoba ayatshazwa. Okuhle ngokulima amatamatisi kuqanda yikuthi kukalutshwana ukuthi abanjwe yimikhuhlane. Imikhuhlane ehlasela amatamatisi ithanda isikhathi sokutshisa lesezulu,” kuchasisa uNkszn Mpofu 

Utshilo  njalo ukuthi okudingakalayo nje yikuthi umlimi avikele amatamatisi akhe emqandweni ngokuthelela ikakhulu ntambama lasemadabuka kusa ukwenzela ukuthi angatshazwa.

“Umlimi kumele avikele amatamatisi akhe ekutshazweni ngokubasa umlimo kube lentuthu ezadlula phezu kwezilimo zakhe. Indlela le ivikela ukuba umtshazo ungahlali esilimeni samatamatisi. Lokuwathelela ngezikhathi zantambama lasemadabukakusa lakho kuyavikela ukuthi amatamatisi angatshazwa,” kuphetha uNkszn Mpofu.

 

 

 

Share This:

Sponsored Links