uMthunywa
Nkosilathi Sibanda
ABAHLABELELI bakuleli sebekhuthazwe ukuthi baqine kumculo wezokholo ngoba ulamandla okuletha inguquko, uphinde usindise inengi labazalwane bakuleli ababhekane lenkinga ezithile.
Inkuthazo le ivele kuMfundisi uBruce Edwards, owebandla leKingdom Empowerment Centre (KEC) ngemva kokuqhutshwa komcimbi wengoma zokholo lwesiKhristu obudibanise inengi labaculi koBulawayo. Umcimbi lo, owawuqoqwe libandla le-KEC lincedisana lamanye amabandla labafundisi, wenziwa ngenyanga edluleyo enkundleni yeZITF.
UMfundisi uEdwards, osethole inhlonipho ngokukhankasela ukuphakanyiswa komculo wokholo lwesiKhristu, uthe ukuqoqwa komcimbi wabaculi lo, kubavule ingqondo bakubona kufanele ukuthi kwelizayo kwenziwe umbuthano efanayo.
“Awuphakame umculo we-gospel. Ngaleyo ndlela sizabe siphakamise abaculi, ukusindisa abantu lokuletha ukuthula empilweni zabantu. Ngikhuthaza abaculi bakuleli ukuthi basondele duzane loJehova, bathole ukusindiswa ukuze kube lula ukuthi batshumayele ilizwi leNkosi ngomculo,” kutsho uMfundisi uEdwards ongumkhokheli omkhulu webandla leKEC.
“Umcimbi lo engikhuluma ngawo ubukuzinga eliphezulu. Siphelelwe, ikakhulu ngenani labantu akade bekhona. Sibonga bonke abaculi, abafundisi lamaKhristu ababuya ngobunengi ukuzosekela umkhankaso wethu wokuphakamisa umculo wokholo.”
Abaculi abangene esitikini bajabulisa uzulu babalisa uSiza Mdlongwa, uMai Mwamuka, Vocal X, Minister Mahendere lamaqembu ama-choir amabandla atshiyeneyo.
Ekhuluma lentatheli kaMthunywa, uSiza Mdlongwa, osethole ukusindiswa kakutsha, uthe imikhosi enjenga le iqakatheke kakhulu.
“Akula okungijabulisa ukwedlula ukuhlabelela abantu, ikakhulu ukuhlabela umculo we-gospel. Okwenziwa ngabafundisi bethu lamabandla abo kuyesabeka.
Siyababonga kakhulu njengaba hlabeleli.”
“Ukuhlabela lamaqembu abalisa ele-Vocal X loMfundisi uMahendere kwaba yisibusiso sibili.
Njengoba abafundisi bethu besitsho, lami ngivumelana lakho ukuthi abanye bethu kwezokuhlabela abasondelele eNkosini, sibebanengi abaculi bengoma zokholo,” kutsho uMdlongwa, osephenduke wabayintandokazi yabalandeli bomculo.
UMfundisi u-Edwards welule ukuba baphezulu kokuqoqa njalo omunye umkhosi womculo.
“Silenhlelo ezithile eziqondane lokusondeza abantu eNkosini sisebenzisa umculo we-gospel. Esikhathini esifitshane esizayo, sizabika ngalokhu,” kutsho umfundisi lo.
