uMthunywa
“SekaNcuncu ngicela eyesinkwa nje kodwa lokhu, awungizweli ngani ngihawula kangaka?” kutsho uNakaNcuncu inyembezi ziphahle umbombo.
Lesi yisiqephu esithethwe kugwalo “Awungizweli ngani” olulotshwe nguNokuthula Majamela Sibanda.
Abalobi bengwalo zesiNdebele batshayela ihlombe umlobi lo odume ngelithi “Majamela The Lioness” ngokuloba ugwalo lwakhe olutsha.
USibanda usebenze gadalala ukuthi aqede ugwalo lolu olwadindwa yiHeart Flames Readers and Pentolacut Publishers oselubatshazwa izwe lonke.
Ekhuluma lephephandaba likazulu, umqondisi weHeart Flames Readers and Pentolacut Publishers uSamantha Nunu uthe ugwalo lukaMajamela luzengezelela umthombo wolwazi wolimi lwesiNdebele.
“Ngemva kokuba umlobi lo elobe inkondlo labahayi benkondlo egwalweni, Umthombo Wenkondlo, ubeseke wakhupha ugwalo lwakhe lwakuqala oluthi Inyembezi lona oluhlabusa okwamagama,” kutsho uNunu.
Uthe umlobi waguqula inkondlo yakhe ethi “Esandleni Somuntu” eyisa elimini lwesikhiwa wayithi, “In the human hand” yona evezwe emphakathini ebulenjini be-Facebook.
Kusandulelo sogwalo esalotshwa nguZibusiso Mabonisa, kuchazwe kabanzi ukuthi uMajamela waloba ngobukhulu ubungcwethi.
“Ulimi olusetshenzisiweyo luhlambulukile lubuye luyahlabusa samhlane wehlabusi, luyaveza inhloso yomlobi ekuvuseleleni ulimi lukaMthwakazi, lona esilubona lutshabalala kancane kancane.
“Ngemva kokubala lolugwalo ngibe ngusibindi gidi, ngazi ukuthi loba bethi kalubulawe, kalusoze lwabulawa. Kambe luyangaphi? Silamaqhawe lamaqhawekazi afana lo Nokuthula Sibanda, amise imihlonga samaganyana emele ukulwa, elwela ukuvuselela lolulimi lwethu oluhlabusa kangaka. Awungizweli ngani? Lo, ngumbuzo obuzwa ngohlulukelweyo. Lolugwalo luyalaya, luyafundisa ngezibonelo kanti luyaxwayisa ekugcineni.”
