uMthunywa
UMONGAMELI welizwe, uEmmerson Mnangagwa usekhuthaze izizalwane zakuleli ukuthi ziqaphele ngamandla umkhuhlane weCovid-19 njalo kwenziwe isiqiniseko sokuthi inhlelo zonke eziphathelane lalumkhuhlane zilakho ukumelana lezizalwane zakuleli ezisuka kweleSouth Africa zingahlolwanga.
Ilizwe leSouth Africa ngeviki ephelileyo limise ukuhlolwa kwezihambi ezisebenzisa umngcele weBeitbridge ukuze kwehliswe isiminyeminye ebesesikulo umngcele.
Isiminyeminye lesi sibangele njalo ukufa kwabantu abahlanu kunsuku ezimbili kukanti njalo besekudaleke inkinga yokusiza kulindawo.
Ekumiseni ukuhlolwa kwezihambi, ugatsha lwezempilakahle kweleSouth Africa lubike ukuba lithethe lesisinqumo ngoba linanzelele ukuthi izihambi lezi zihlolwa ngendlela efanayo zingafika kweleZimbabwe.
Ekhuluma ngemva kokwamukela imibheda emithathu enikezwe isibhedlela seKusileni ngabenhlanganiso ye-Ekusileni Medical Centre Covid-19 Hospitals UK ngoMvulo, UMphathintambo obona ngokwenzakala kusabelo sakoBulawayo uJudith Ncube uthe ngemva kokuzwa ngokumiswa kokuhlolwa kwezihambi ezisuka kweleSouth Africa kumngcele weBeitbridge uhle wabikela umongameli welizwe ngokukhathazeka kwakhe ngalelinyathelo nanko phela uMongameli ubekoNthuthu ngempelaviki.
Uthe yiloba ilizwe lingelamandla okuguqula amanyathelo athethwe ngomakhelwane, kungumlandu wethu njengesizwe ukuthi samukele izizalwane zakuleli ngezandla zombili.
UMphathintambo Ncube uthe uMongameli Mnangagwa uthe kumqoka ukuthi ilizwe liqinise izinhlelo zalo ukuze kwenziwe isiqiniseko sokuthi inyathelo leZansi kalisoze libangele ukukhuphuka ngesilinganiso esesabekayo sabantu abatholakala beleCovid-19.
“Bengikhuluma loMongameli ngempelaviki ngimbikela ngokukhathazeka kwami ngenyathelo eselithethwe ngomakhelwane. Ngimtshele ngathi sokumele sifake lathi amanye amanyathelo azasisiza wangiphendula wathi akula esingakwenza okwamanje ngaphandle kokuthi samukele abantu bethu ngoba beyingxenye yethu,” kutsho uMphathintambo Ncube.
Uthe izizalwane zakuleli zonke zilendima yokudlala ekuvikeleni ukumemetheka kwe-Covid-19 ikakhulu khathesi sesikhanelane lohlobo olutsha lwalumkhuhlane.
Wengezelele wathi wadana kakhulu ngesikhathi evakatsha edolobheni wananzelela ukuthi abantu kabasayilandeli imilayo yeCovid-19.
“Ngike ngabhoda koNtuthu nje, kunsuku ezisanda kwedlula ngananzelela ukuthi abantu abasayilandeli imithetho yokuvikela iCovid-19. Abantu kabasazigqoki izaheke. Bakithi asilandeleni imilayo le njengokubekwa kwayo,” kutsho uMphathintambo.
UMphathintambo uphinde njalo wabonga abenhlanganiso ye I Am for Bulawayo Fighting Covid-19 Trust, ngokuzinikela ekufezeni iphupho lokuthi isibhedlela se-Ekusileni Medical Centre sivulwe.
“Sifuna ukwenza isiqiniseko sokuthi kusiyafika isikhathi sokuvulwa kwesibhedlela lesi konke kube sokulungile. Lokhu kuzakwenza bonke labo abazalaliswa kulesisibhedlela basizwe baphinde basile ngokuphangisa. Asifuni izigulane ziswele ithemba ngenxa yokuswelakala kwemitshina kanye lemithi esibhedlela lesi,” kuphetha uMphathintambo Ncube.
