Asivivinye kwezolimi lomumo!

27 Oct, 2022 - 00:10 0 Views
Asivivinye kwezolimi lomumo! Izulu

uMthunywa

Sikhumbuzo Dabengwa

Selidumile elensewula bakwethu. Lokhu kungumbuzo kithi sonke esibhalayo ukuba kambe sesilungisile inhlanyelo kanye lakho konke okuzasenza silime kuhle. Bafundi kuqakathekile ukuba sinanzelele umumo esiwuphiwayo.

Umumo oveza ukudelela kumele siwusole. Umumo oletha ukuhlonipha kumele siwuncome ngoba sifundiswa ukuba siphendule kuhle.Asikhangeleni izethulo ezilandelayo sitsho ukuba siphatha njani umumo munye ngamuye.

Izimpendulo akube ngezakhayo, ezilobuntu kanye lokwazi amasiko kanye lokuphilisana labanye abantu. Nanzi-ke izehlakalo.

1) Lisendlini yokuhlala. Lizibukelele umabonakude. Nangu umuntu wemzini engena ngemva kokuqoqoda emukelwe. Abadala sebeqalile ukuxoxisana kodwa owemzini sekumalela ukuba ethule udaba ahamba ngalo ngoba wena labanawakho lokhu lithe pekle ezihlalweni libheke kumabonakude. Lingabantwana abalomthetho kufanele –

a) Lisukume lixekele abadala bazikhulumele bodwa.

b) Siqhubekele phambili ngesikwenzayo ngoba lumuntu usifice sizenzela okwethu.

c) Abadala bayahlupha, bangakhuluma abaqedi ngiqinisile, kulungile sizihlalele labo bazixoxele.

2) Abadala bavakatshile elizweni eliseduze lani okwesikhatshana ngesikhathi sezulu. Batshiye beqonqosele ukuba lisale liphethe kuhle umuzi. Batshilo ukuba lisebenze ekuhlanzeni izindlu, iguma kanye lokuziphatha kuhle imbala. Nxa bephenduka bafica okulandelayo. Tshono ukuba uvumelana laleso  senzo kumbe uyasisola.Letha lezizatho.

a) Umuzi usugcwele ukhula, sekudaleke indlela eya endlini. Akucentwanga. Akulungiswanga lutho.

b) Umuzi usudinga ukukhangelwa ngoba ingcekeza usuka layo esangweni uze uyengena endlini.

c) Akulambuzo ukuba kuhlanzekile ekhaya. Umuzi ucwethulekile ngokuhlanzeka. Abantwana bonke bahlanzekile njalo bazihlupha ngemisebenzi yesikolo. Kakho ohlupha omunye.

d) Sekukomachanca, kompunzi idla emini. Umthetho awusaziwa lapha. Olunye luyangena olunye luyaphuma. Olupheka iqanda luthi lukhipha isitsha olunye luphanyeka enye imbiza. Kubi.

3) Lisendlini yemihloliso. Libhala umhloliso oqakathekileyo ozeguqula impilo yenu. Nangu omunye umfundi esehoqa. Kagqize qhakala ngokwenzakalayo. Kuyini okungafika kuwe ngalo umfundi?

a) Umfundi lo kalandaba lempilo yakhe ngoba ethembe ilifa labazali.

b) Umfundi lo ubulawa yikuthatha okudakayo angananzi impilo yakhe.

c) Umfundi lo ukhohlakele. Udinga usizo olukhulu ngoba udlala ngegeja kuziliwe.

Siyananzelela-ke bakwethu ukuba silomango omude ekuphileni kwethu. Asinanzeleleni izindlela esiphila ngazo bakwethu.

Umthetho uqakathekile, ukuziphatha, ukuhlanzeka, ukuhlonipha kusemqoka bafundi. Asihlanganeni kwelizayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds