uMthunywa
KUQAKATHEKILE ngalesi isikhathi somnyaka ukuthi sazi incezu ezithile ezinonisa ulimi lwethu. Incezu lezi ezithi nxa zisetshenziswa ulimi lujiye ngamandla, lubemnandi. Kuhle nxa zisetshenziswa kundaba zokuzibumbela silungiselela imihloliso, ozayiloba kuthi lozakufunda indaba yakho avume ngempela ukuthi ihlotshisiwe. Akesikhangele izifenqo zenkulumo. Zona-ke zingachazwa njengencezu zenkulumo ezisetshenziswa nxa kugatshazwa ngolimi kugcizelelwa kumbe kubalulwa kahle lokho umuntu ayabe ekhuluma ngakho. Nansi imihlobo yezifenqo zenkulumo.
a) Isifananiso/isifaniso ucezu lolu yindlela yokukhuluma nxa sifanisa izinto ezimbili ezingafananiyo. Ucezu lolu lusebenzisa izakhi ezifana labo; oko, okwa, okwe, njenga, njenge, sa njalo njalo isibonelo intombazana inhle okwelanga liphuma uyise ukhuluma njengomfazi.
b) Isingathekiso lucezu olwenza umsebenzi wokufanisa njengesifananiso kodwa zehlukile. Umehluko yikuthi isingathekiso sona sisebenzisa izikhali zesibanjalo isibonelo uyise uyindlondlo uyesabeka.
c) Ihaba yindlela yokukhuluma samuntu oqamba amanga kodwa kungenjalo usenzela ukuthi lokho okutshoyo kube lesisindo njalo kuhlabuse kolaleleyo isibonelo ugijime wazibulala kodwa bamncitsha umvuzo. Uyise mude uthinta amayezi. Ububi bakhe bahlekisa isela licatshile.
