uMthunywa
NGEVIKI edluleyo besixoxisana ngemidlalo yabantwana yokulola ingqondo. Ngithemba-ke bafundi lenelisile ukulibhana laphuma lazo impendulo eziqondileyo. Zihlole-ke ukuthi lenelisile na ukulibhana.
Ngikulibha:
1. Ngechibi lami okuthi kungawela ulutho phakathi kwalo lichithe amanzi – yilihlo
2. Ngabafazi bami abaloyayo kodwa bapheka ukudla okuthandwa ngabantu bonke – zinyosi
3. Ngomfana wami odla ekhafula – lihloka
4. Ngomvundla wami ophekwa ngesikhumba sawo – yinhlanzi
5. Ngesalukazi sami esithi nxa silambile sibe lomusa kodwa sithi singasutha sibalolaka olubi – ngumfula
6. Ngomuntu wami ohlala phezu kwezihlalo ezintathu – yimbiza
7. Ngabantu bami abalabantwana babo, kuthi kungagula abadala abantwana bayebabona babelaphe kodwa kungagula abantwana abadala abayibabona – zinyawo lezandla
8. Ngenkabi zami ezithi zimi iketane ibihamba – ngamajodo lentanga enabayo
9. Ngenkunzi yami ethuza iqethukile – ngumankunzane /ameva
10. Ngendoda yakithi ezitshaya ikhale – liqhude
11. Ngenkomo zami ezinatha mthombo munye – zintungo zendlu
12. Ngenkunzi zami ezihlala zithobelene – ngamaseko
13. Ngentaba yami ekhwelwa ngezandla – yisitshwala
14. Ngemithombo yami echaywa ebusuku emini iyabuthwa – zinkanyezi
15. Ngentombi egida edakeni – luphehlo
16. Ngenyoka engena emlindini ngomsila – yingidi
17. Ngesimu yami enkulu kodwa mhla ivunwayo amabele ayo agcwala isandla – likhanda lenwele
18. Ngomfana wami ohlanza ngembambo – yisihluzo
19. Ngentombi yakoGwebu ephephethwa ingaphandlwanga – butshwala
20. Ngomganu kamama ongahlalwa mpukane – ngumlilo
