uMthunywa
NGEVIKI edluleyo besixoxa ngokwenza izinto ezitshiyeneyo, lezo zenzo sizibize ngolimi oluqondileyo.
Besikhangela ukwenza izinto zilunge umsebenzi wazo sisebenzisa njalo amabala okuchasisa kuhle, ngokucacileyo lezo zenzo.
Nanzi ezinye zezimpendulo obungaphuma lazo kumsebenzi weviki edluleyo.
1. Uyisemkhulu kaDumisani ucije izikhonkwane zokubethela isigogo.
2. Ubaba ucandula ikhuba likamama ngoba selibuthundu, alisahlakuli kuhle.
3. UNakaNonceba uyaqala aqandule ilitshe lakhe engakacholi.
4. Uninakhulu uleminwe, indiwo azibumbayo uyazilolonga engakazitshisi.
5. Ungabona ubaba elola ingqamu yakhe ubohle wazi ukuthi uzasihlabela imbuzi.
6. Nxa ufuna imbokodo yakho ichole kuhle uboqala uyilolonge ungakacholi.
7. Inkomo zikaNxusani zebumba zinhle ngoba ubezilolonga zingakomi.
8. Uhlikihlela ucingo elitsheni nje uyalulola ukuze enze ngalo usungulo.
9. Imbemba yakhe ibukhali okwensingo ngoba ubesanda kuyilola.
10. Abafana abelusayo babethathe izipikili ezinkulu bazilole zize zibe njengengqamu.
11. Okhokho babelola imikhonto yabo icije njengesikhathi sempi ukuze bazivikele.
12. Ubaba nxa esiya gamula uyalola ihloka lakhe ukuze libebukhali.
Ngababili yakhani imitsho elitshumi liveza ukwenza ulutho oluthile lwenzeke ngobunono obukhulu.
