
Bhekimpilo Tshalibe
OBABA abavela endaweni ezitshiyeneyo ezibalisa eGweru, Nyathi, Ntabazinduna kanye lakoBulawayo bebethe gwaqa eAcaja eduze leNtabazinduna lapho akade ezijabulela esosa inyama, edlala imidlalo etshiyeneyo njalo ehlafuna lendaba ezitshiyeneyo ngempelaviki.
Umcimbi lo uhlanganise obaba abatshiyeneyo ukuba bahlale phansi njengamadoda bakhulume ngendaba ezibahluphayo emakhaya.
Obaba abanengi bebekhala ngokuthi amakhosikazi abo awasabaphathi njengabantu abalesithunzi emizini yabo, njalo kabababongi ngezinto ababenzela zona.
Intatheli kaMthunywa ixhumane loMnumzana Abednico Dube umnikazi weAcaja njalo enguye ohlele ukuthi amadoda ahlangane axoxisane.

Acaja
“Obaba abanengi bakhala ngesiphatho esivela kumakhosikazi abo esingatshengiseli ukubonga,” kulandisa uMnu Dube.
Uqhubekele phambili esithi obaba bebekhalaza ngokusweleka kwenhlelo zikaHulumende ezibasekelayo okubangela ukuthi inani labobaba abazibulalayo libe phezulu.
“Okunye obaba bakhala ngokuswelakala kwenhlanganiso ezibasekelayo okubangela ukuthi kube lenani eliphezulu labobaba abazibulalayo,” kulandisa uMnu uDube.
Inthatheli iphinde yezwa kuthiwa e-Acaja bebexoxa bebonisana ngendlela zokuqalisa amabhizimisi.Uqhubekele phambili esithi:
“Besixoxisana ngendlela ezitshiyeneyo zokuqala amabhizimisi njalo lokuthi umuntu angenzanjani ukuze ibhizimisi lakhe laziwe ngabantu abanengi, lokuthi singenza njani ukuze amabhizimisi ethu engawi. Okunye futhi sibonisene labobaba ngokuthi singahlela njani ukuthatha umhlalaphansi kusaselesikhathi” kuphetha uMnu Dube.