uMthunywa
Musa Janga
ABALIMI sebekhuthazwe ukuba balime i-spinach ngoba singakhethi isikhathi njalo silomkambo omuhle.
Ekhuluma lentatheli kaMthunywa uNkosazana Samkelisiwe Sibanda weFarm and City Centre ubike ukuthi abalimi kabalime imibhida ye-spinach ngoba ayikhethi sikhathi njalo ingabalethela inzuzo enhle.
“Okuhle nge-spinach yikuthi siyalimeka iloba yisiphi isikhathi. Kuleminye imibhida ekhethayo isikhathi sokulima kodwa i-spinach asikhethi kusiya ngokuthi umlimi usilime njani njalo usanekekela njani,” kuchaza uNkszn Sibanda.
Uqhubeke walandisa ngokulimeka kwaso.
“Imibhida ye-spinach ivuma kuhle emhlabathini ovundileyo ngakho sicebisa abalimi ukuthi basilime emhlabathini lapho abatshintshanisa khona izilimo i-crop-rotation. Umlimi kumele akhethe indawo angakaze asilime khona ukuze sivikeleke emikhuhlaneni evame ukuhlasela impande zaso.
“Okunye njalo umlimi nxa efuna ukuba lesivuno esihle se-spinach kumele indawo yakhe ibemanzi kungakho-ke ungavele ufake inhlanyelo phansi kumele uhlale uyithelela sikhathi sonke leyondawo,” kulandisa uNkszn Sibanda.
Ubuye wathi umlimi kumele azame ukuvikela isilimo sakhe kuzibungwana ukuze kungaphambaniseki isivuno sakhe.
“Izibungu ziyona imibhida umlimi acine elahlekelwa yisivuno sakhe ngakho kumele kwenziwe isiqiniseko sokuthi ziyavikelwa ngokuyifafaza ngemithi,” kuchaza uNkszn Sibanda.
Uphethe ngokuthi i-spinach silomkambo omuhle njalo okwenza kube njalo yikuphathisa kwaso kumpilakahle yabantu.
“Inengi labantu sebabalolwazi lokuthi i-spinach siyaphathisa kumpilakahle ngakho sebesithenga kakhulu, umlimi osilamayo engazitshayela imali enhle,” kuphetha uNkszn Sibanda.
