uMthunywa
Ethel Ncube
AKUBIZWA ozwayo ngoLwesine enkundleni ezitshiyeneyo zeNingizimu yelizwe lapho okuzabe kuthakazelelwa ilanga lapho ilizwe leZimbabwe elathola khona uzibuse.
Abaphathintambo ababona ngokwenzakala kuzabelo ezibalisa koBulawayo kanye leMatabeleland North baveze ukuthi amalungiselelo omkhosi lo asekuzinga eliphezulu njalo bakhangelele ukuthi wonke umuntu abe moya munye kuthakazelelwa usuku lolu.
Intatheli ixhumane loMphathintambo okhangela ngokwenzakala esabelweni sakoBulawayo uKhomuredi Judith Ncube oveze ukuba amalungiselelo asekuzinga eliphezulu.
“Amalungiselelo asesiya emaphethelweni njalo ngithanda ukunxusa uzulu wonke wakoBulawayo ukuba abuye sizohlanganyela sikhumbula ilanga leli enkundleni yeWhite City koBulawayo.
“Ilanga leli liqakathekile kakhulu njalo ngifisa ukuba ngabe uzulu wonke uyalihlonipha ngoba lisikhumbuza inkululeko yethu njalo ngikhuthaza abantu ukuba babambane njalo sikholise sindawonye,” kubika uKhmrd Ncube.
Obona ngokwenzakala esabelweni seMatabeleland North uKhomuredi Richard Moyo uthe eLupane amalungiselelo asephutshile.
“Amalungiselelo asephelile, sesilinde ilanga ukuthi lifike kuphela siyegubha lolusuku enkundleni yeSomhlolo eLupane. Nginxusa abantwana labadala ukuba babuye ngobunengi babo sikhumbula lelilanga esathola ngalo uzibuse.
“Ilanga leli liqakathekile ngoba yikho lapho esathola khona ukuba sizibuse,” kuveza uKhmrd Moyo. UMthunywa ukhulumisane lesinye isakhamuzi sesabelweni seMatabeleland South uMnumzana Lerato Ndlovu oleminyaka engu-54 yokuzalwa ochaze ukuqakatheka kwalelilanga.
“Ilanga leli liqakathekile kakhulu ngoba yikho lapho esathola umbuso wethu ngemva kwesikhathi eside sibuswa ngabelungu. Kungakho siyalikhumbula ngoba khathesi sesizibusa, amandla asesezandleni zethu.
“Okunye ngalelilanga siyabe sikhumbula amaqhawe adlulayo labaphilayo ukuba benza umsebenzi omkhulu kakhulu ukuthi uzulu omnyama athole inkululeko, khathesi siyakholisa ukuzibusa,” kubika uMnu Ndlovu.
Uphethe ngokukhuthaza intsha ukuthi alondoloze uzibuse lo owabuya ngemva kokuchitheka kwegazi.
