uMthunywa
Thokozile Mbedzi
UMBUKISO weZimbabwe International Trade Fair wehlandla lesi-63 uqale lamuhla emagumeni la. Abamabhizimusi akuleli kunye lamanye amazwe baqhubeka betheleka koBulawayo loba abanye sebeqalile ukubukisa enkundleni le.
Umbukiso walonyaka uqhutshwa ngaphansi kwendikimba ethi: “Transformative, Innovation, Global Competitive” njalo inani labantu abaze kumbukiso lo likhuphukile kulelomnyaka ophelileyo.
Umbukiso walonyaka uzavulwa okusemthethweni ngoLwesihlanu nguMhlonitshwa INkosi uMswati Ill wombuso webukhosini weSwatini.
Ekhuluma lentatheli uMgcinisihlalo wenkampani yeZITF uMnumzana uBusisa Moyo uthe akusalali nyoka emagcekeni eZITF.
“Lonyaka inani labaze kumbukiso likhuphukile. Kuyacaca ukuba kuzosetshenzwa ngoba abazobukisa abanengi sebekhonalapha koBulawayo. Silababukisi abangu-533 njalo bathenge indawo eyi-46,631 square metres yona engaba i-97% yendawo yonke esilayo lapha,” kuphetha uMnu Moyo.
