Umlobi kaUmthunywa
IZIMBABWE izamelwa ngabadlali abayisikhombisa kumidlalo yamaOlympics eParis kweleFrance.
Imidlalo le izaqala kusasa.
Ama-Olympics yimidlalo emikhulu egoqela zonke izizwe njalo kulabadlali abavela kumidlalo etshiyeneyo.
Ujaha oyimbabazane njalo ephethe irekhodi kwezokugijima eZimbabwe okulibanga eliyi 42.2km uIsaac Mpofu uzakhokhela leliqembu. Useleminyaka emibili egijima esiba lezikhathi ezingaphansi kwe 2 hours 10 minutes ezimbalwa.
Lokhu kukhomba ukuthi uyimbabazane njalo isikhathi esihle kulazo zonke asesigijimile yi-2 hours 06 minutes.
Ukuze abelelungelo lokuyagijima kumidlalo le, uMpofu wagijima ngaphansi kwe 2 hours 08 minutes njalo uyakulimidlalo ithemba likhona ngemva kokuthola isicoco se-bronze kumaAfrican Games ngoMbimbitho.
Babili abagjima lelibanga omunye nguRutendo Nyahora.
URutendo uyakumidlalo le ngokunxuswa ngoba kasigijimanga isikhathi esiyabe sibekwengabaqoqi bemidlalo le. Isikhathi sakhe esedlula zonke yi2 hours 32 minutes kodwa amankazana amanye amazwe abetshaya o-2 hours 20 minutes.
Kulamajaha azimbabazane ababili abephula isikhathi sikaBrian Dzingai esika 2004 ese20.12 seconds kumango we200m uTapiwanashe Makarawu loMakanakaishe Charamba yibo abazamela iZimbabwe kumincintiswano leyo. Bangabanye kubantu abangu-48 abazagijima kuzekusala abayisifica munwembili kumjaho wokucina lapho okuphiwa izicoco zegolide, isiliva lebronze.
Makarawu onguye olesikhathi esingcono kulabobonke abazalwa kuleli ku200m ese19.93 seconds kuthi ijaha lakoCharamba lalo layala ukusalakude lathi tshwati nge 19.95 seconds.
Nxa kuhlanganiswa izikhathi ezinhle ezigijinywe lonyaka uMakarawu ungowesitshumi (10) kukanti uCharamba ngowetshumi lantathu (13).
Kulethuba lokuthi nxa bengazibamba bangasukumi abanye bengakenzi njalo (false start) bangafika kwabayisifica minwembili (final). Kungabangokwesibili ukuthi kwenzakale njalo. Owasungulayo leyo nhlanhla nguBrian Dzingai ngo 2008 imidlalo iseBeijing, eChina.
UDzingai waqeda engowesine kumncintisano owathathwa nguUsain Bolt. Kulababhukutshayo ababili abazamela ilizwe uDenilson Cyprianos lo Paige Van der Westhuizen.
Owesikhombisa nguStephen Cox odlala irowing.
AbeZimbabwe sebekhonale.
Umama kaCyprianos uNokuthula usuke koBulawayo ngoLwesithathu emini esiya eFrance ukuyabukela icinathunjana lakhe. Uthe uyajabula
ukuthi ujaha uphakamise obosendo lwakoCyprianos leZimbabwe yonke jikelele.
“Siyaziqhenya ngokwenziwe nguDenilson ngabe uyise usaphila ubezajabula,” kutsho uNokuthula.
