YiNtatheli kaMthunywa
INDUNA yeKezi isikhalaze ngokutshontshwa kwentambo zamagetsi esigabeni lesi osekubangele ukuthi isibhedlela seMaphisa siqede inyanga ezimbalwa singelamagetsi.
Intatheli kaMthunywa ixoxisane lenduna uVuyani Nyangazonke wesigabane lesi yena oveze ukudana ngesenzo samasela la asebisele intuthuko esigabeni lesi emuva.
“Sithwele nzima ngamasela atshontsha intambo zamagetsi lapha. Okubi yikuthi abantu abatshontshayo laba abakhangeli ingozi abayabe sebezidalile ngokutshontsha intambo lezi.
“Isibhedlela kasisasebenzi kuhle ngoba akuselamagetsi okuyinto eyingozi kakhulu kuzigulane ngoba ukuswelakala kwamagetsi kungadala ukuthi sicine silahlekelwa zimpilo zabantu ikakhulu labo abasemitshineni,” kuchaza induna uNyangazonke.
“Abantu abenza lokhu abakabanjwa njalo lokhu kusadingisiswa. Asikwazi ukuthi kungaba ngabantu besigabeni kumbe ngabantu baphandle kodwa into abayenzayo imbi,” kulandisa induna uNyangazonke.
Omunye wabosomabhzimusi wesigabeni lesi ubike ukuthi indaba yokutshontshwa kwentambo zamagetsi sibaphambanisele amabhizimusi abo.
“Thina njengabantu abalezitolo ukutshontshwa kwentambo zamagetsi sekusidalele umonakalo kumabhizimusi ethu ngoba sekusibisele emuva. Njalo ngohlupho olukhona lwemali elizweni kuzakuba nzima ukuthi intambo lezi zithengwe zibuyiselwe masinyane,” kuchaza uMnu Ndlovu.
Kudaba olufanayo koBulawayo lakho kube lamalokitshi amabili eRichmond lase QueensPark asele esebunyameni ngemva kokuba kutshontshwe intambo zamagetsi.
Isikhulumi samapholisa uChief Inspector Precious Simango ubike ukuthi indaba yokutshontshwa kwentambo zamagetsi lokhu besayidingisisa njalo akulamuntu osebotshiwe.