uMthunywa
UKUHLOHLA amabhola amabili afikise iqembu leLamontville Golden Arrows duzane lenkezo leNedbank kutshiye umgadli waleliqembu uKnox Mutizwa elangazelela ukuqhubekela phambili ewathela emambuleni.
IGolden Arrows inqobe iBloemfotein Celtic nge 2-0 kumdlalo oqhutshwe ngempelaviki.
Ekhuluma loMthunywa ngoLwesibili ese-South Africa, uMutizwa, ophinda abengumdlali wamaWarriors uthe umdlalo osanda kwedlula usumakhele indawo eqenjini lesizwe, okuzenza angasali kuqula labadlali ku-2019 Africa Cup of Nations (Afcon) ezodlalelwa eGipite ngoNhlangula.
“Ngizizwa ngikufomu sibili. Ukunqoba kwamaWarriors, ephumelela ukuyadlala kuAfcon kungenze ngaba lokuzethemba. Imidlalo yami eseleyo izatshengisela ukuthi angeke ngisale ukuyadlalela isizwe sakithi,” kutsho uMutizwa.
Umgadli lo, owasuka kuHighlanders esiyadinga amadlelo eSouth Africa uthe isifiso sakhe njalo yikuthi amabhola awahlohlayo enelise ukuncintisa kusicoco sePSL Goal of the Season kabili kulandelana.
“Ibhola elingena emanethini lidle ubhedu lingahlohlwa loba ngubani enkundleni. Ngilawo amabhola engawahlohlayo engilesifiso sokuthi abonakale nxa sekudingwa lelo elizaphiwa isicoco sePSL Goal of the Season.”
Ukuhlohla kukaMutizwa sekutshintshe imbali yenkezo yeNedbank engakaze iphakanyiswe liqembu eliphuma eKwaZulu Natal.
Ebuzwa ngebhola elihle alihlohlayo kulisizini, uMutizwa uthe ukhumbula lelo alikhaba bedlala leMaritzburg United. Kulumdlalo uMutizwa wahlohla i-scissors kick ayibasela emambuleni kuqala isizini le.
“Ngilokuzethemba njalo ngibonga uNkulunkulu ekuthini nxa ngisenza kuhle kanje, ngizakhela imbali ezanginceda nxa kukhethwa abadlali beZimbabwe abazadlala kuAfcon,” kutsho lumdlali.
UMutizwa uzabanga indawo yabagadli kumaWarriors labadlali ababalisa uKnowledge Musona, Khama Billiat lo-Evans Rusike.
