Angahamba ujaha . . . IBosso idlala ngesikhathi kuMhindirira

20 Jun, 2024 - 00:06 0 Views
Angahamba ujaha . . . IBosso idlala ngesikhathi kuMhindirira uDevine Mhindirira

uMthunywa

Innocent Kurira

IQEMBU leHighlanders lingaqina ngokuwomela esikhwameni, lizazisola.

Indaba esegudwini ngethi iHighlanders ilokhe idonsela emuva ekuthini ivuselele isivumelwano sayo lomdlali uDevine Mhindirira. Umfana lo uphethe isivumelwano esiphela mhlaka 30 Nhlangula.

Udletshana olufinyelele iZimpapers Sports Hub luveza sobala ukuthi uMhindirira usengahluthunwa yiSimba Bhora kumbe iChicken Inn. Abafakazi abaqotho babika lokhu bengathandabuzi, besengeza lokuthi uMhindirira usesola ukudonsela emuva kweqembu.

“I-Simba Bhora leChicken Inn zilengcebethu elemali ethe xaxa kulaleyo ezakhitshwa yiHighlanders, nxa izayikhipha. Bengaphuza, lizezwa kuthiwa umfana usehambile.

“UDevine uyayithanda iHighlanders njalo ufuna ukuthi abelempilo elempumelelo kuyo. Kuzamzwisa ubuhlungu ukuthi ayifulathele kodwa akulanto angayenza nxa amanye amaqembu emthembisa impilo engcono,” kutsho umfakazi oqotho oseduzane lokwenzakala kulumdlali.

Njengenjwayelo, nxa kukhulunywa ngabadlali, unobhala weHighlanders uMorgan Dube ukhethe ukuthi atshele iZimpapers Sports Hub ukuthi bazavumelana loMhindirira.

Kusele amaviki amabili ukuthi siphele isivumelwano sikaMhindirira leHighlanders.

“Sisaxoxisana lomdlali. Siyethemba njengoba sifika ekupheleni kwalinyanga sizabe sesiyiqedile eyesivumelwano,” kutsho uDube.
UMhindirira, ongumdlali wasesiswini obatshazwa ngokusebenzisa ingqondo kakuhle nxa elebhola, ubonakale edlala ngokuzikhandla eqenjini lika-Kelvin Kaindu. Ukumekela etshiya iBosso kungabuyisela muva imizamo yokufeza amaphupho wokuthwala inkezo yeCastle Lager Premiership kulisizini.

Ngenxa yokulimala kwakhe, uMhindirira wathola isikhathi esincane kuBosso ngesizini edluleyo. Ngalowomnyaka, wabizelwa ukuqondiswa izigwegwe ngemva kokwekela ukuya lolonga okwamaviki amathathu. Wayesetheswa icala lokwephula u-Article 5 (a) (d) (g) kusivumelwano sakhe leHighlanders.

Kazange atholakale elecala ngenxa yokuthi iHighlanders yayilemali yakhe yesizini ka-2019 leka-2022.
Wangena kukhalenda yengcitshi zabadlali ngesizini ka-2022.

Share This:

Sponsored Links

Survey


We value your opinion! Take a moment to complete our survey

This will close in 20 seconds