uMthunywa
Ethel Ncube
KULANDELA uhlupho lwamanzi edolobheni lakoBulawayo ikhansili isivule ama-kiosk amanzi alempompi lapho abantu abazabe besikha khona amanzi ngenhloso yokuzama ukwehlisa imizila emide ebakumabhawuza.
Ikhansili yakoBulawayo isifake i-kiosk yamanzi yokuqala elokitshini lePumula East elempompi ezine lapho abantu abazabe besikha khona amanzi ngesikhathi abenelisa ngaso.
Esinye isakhamuzi selokitshini lePumula esikhulume loMthunywa uNkosazana Mercy Ndlovu uthe ukulethwa kwama-kiosk amanzi sokubehlisele umthwalo wodubo lwamanzi.
“Sibonga ikhansili yakoBulawayo ngokusilethela amanzi eduze lathi. Besilinda ibhawuza siminyene njalo kwesinye isikhathi ibiphuza ukufika kuze kube sebusuku silinde amanzi kwesinye isikhathi siyabe silabantwana emqandweni.
“I-kiosk le izasiphathisa kakhulu ngoba impompi zinengi njalo imizila emide lokuminyana obekusibakhona kuma-bowser abantu befuna amanzi sekuzakuba nganeno,” kuveza uNkszn Ndlovu.
Intatheli ibuye yaxhumana loMnumzana Bhekani Dube oveze ukuba amanzi aseseduze kwabantu.
“Siyathaba esikwenzelwe yikhansili yakoBulawayo, amanzi abesesithwalise nzima kukanti wona ayimpilo njalo ngenxa yomkhuhlane lo okhona abefuneka sibili.
“Besihlezi sisevalweni sisesabela ikakhulu abantwabethu abangamankazana ukuthi bazacina bemitha njengoba besekutshonwa emizileni yamanzi. Ngenxa yalokhu siyabonga esikwenzelwe yikhansili yethu.
“Bekunzima ukuthi sihlale sigeza izandla ukuze sizivikele ku-corona ngenxa yokuswela amanzi kodwa khathesi sesizabe sizikhela ngesikhathi esifisa ngaso,” kutsho uMnu Dube.
