uMthunywa
Wayne Ncube
ABALIMI sebexwayiswe ukuba balime amawemusi ngoba alenzuzo esikhwameni somlimi kanye lemhlabathini ikakhulu angaba manengi.
Ingcitshi kwezokulima, uMnumzana Raphael Ncube olilunga leZimbabwe Farmers Union njalo esebenza kunkampani yeFarm and City Centre ukhuthaze abanye abalimi ukuba kabakhangele indlela zokwenza imali ngokulima amawemusi.
“Amawemusi aqakathekile kakhulu ekuvundiseni umhlabathi wokulima, njalo umlimi angazitshayela imali enhle angawathengisa.
“Amawemusi anganika abalimi imali enengi umnyaka wonke ngoba adingwa kakhulu yilabo abathiya inhlanzi,” kulandisa uMnu Ncube.
Amawemusi alenzuzo enhle kakhulu ekuvundiseni umhlabathi wokulima njalo abalimi akumelanga bakhathazeke ngokuthi kungenzeka aphambanise izilimo zabo, ngoba alenzuzo enhle emhlabathini.
“Abalimi kabadinge ulwazi lokuba izibungu zomhlabathi lezi zikhulisa njani izilimo zabo.
“Kuqakathekile ukuqinisekisa ukwanda kwamawemusi emasimini, ngokwenza njalo abalimi bangenelisa ukuzitshayela inzuzo eceleni,” kuchaza uMnu Ncube.
Kulula ukwandisa izibungu zomhlabathi ngoba abalimi kumele njalo nje baqinisekise ukuba umhlabathi uhlala umanzi njalo lokugebhela izinto ezingabola ezifana lotshani.
