uMthunywa
NGOLWESIHLANU kuqale impi yamazwe amabili ahlezi edelelana kumidlalo wenguqu, iZimbabwe leSouth Africa.
Zombili, ezingomakhelwane abehlukaniswa ngumfula uNgulukudela, zidibana kumdlalo womkhankaso wokuya kumqhudelwano wenkezo yomhlaba ka-2022, enkundleni yeNational Sports Stadium.
NgoLwesithathu ekuseni abadlali baqhubeke ngokulolonga belabaqeqetshi uZdravko Logarusic lomsekeli wakhe uBenjani Mwaruwari.
Okuzavula amehlo ngomdlalo lo yikuthi amazwe womabili ayadelelana njalo adlala umdlalo ongathi uyafana.
Okudala lokhu yikuba inengi labadlali baseZimbabwe badlalela amaqembu eSouth Africa.
Kusukela ngomnyaka ka-1992, ama-Warriors leBafana Bafana sezidlale okwetshumi lanhlanu. Kumidlalo le, sezaqeda zingutshiki lobhanqa kabili.
IZimbabwe yanqoba amahlandla ayisikhombisa, omakhelwane banqoba imidlalo eyisithupha. Kuyavela ukuthi kulokwesabana lokudelelana thize kumaqembu la. Kumbali yomkhankaso wenkezo yomhlaba sezidibane kabili.
Kulumkhankaso, iBafana Bafana yabusa ngokunqoba. Kumdlalo wakuqala mhlaka 9 kuNtulikazi, iBafana yanqoba 2-0, kowesibili ngomnyaka owalandelayo kwaba yi 2-1.
Kuyacaca nje ukuthi amaWarriors alembali enhle yokunqoba phezulu kweBafana Bafana. Kumdlalo wazo wokuncintisa owokucina ngomnyaka ka-2013, kwanqoba amaWarriors nge 2-1.
Abadlali beBafana Bafana bazafisa ukuthi baguqule imbali yokunqotshwa kweqembu labo ngoLwesihlanu, okungaba yinto enzima nxa amaWarriors elungiselele aphelela.
Kusenjalo, kubikwa sekubanjwe abadlali bama-Warriors ababili belegcikwane leCovid-19. Lokhu kutsho ukuba abasoze badlale ngoLwesihlanu.
Abaqeqetshi balomthwalo wokubumba iqembu elizwayo nanko bakhona abadlali abangasoke babekhona.
Kumahlandla onke, uLoga uzatshaywa likhanda ekuqiniseni imvimbi zakhe. UTeenage Hadebe loJimmy Dzingai akade ebathembile abakho.
Ngemva kokudlala leBafana Bafana, amaWarriors azakuya dibana le-Ethopia ngoLwesibili.
