uMthunywa
Nkosilathi Sibanda
AMA-WARRIORS, iqembu lesizwe kumdlalo wenguqu, libuyise uthando lenjabulo kunengi labalandeli bomdlalo ngesikhathi ezifaka kumqhudelwano we-Africa Cup of Nations (Afcon) ozaqhutshelwa e-Egypt phakathi komnyaka ngokunqoba iCongo Brazaville.
Njengomlilo wequbula iqembu lasekhaya liqale ngamandla lihlasela kulandelana kwaze kwatholakala ibhola ngemva kokuba abagadli beCongo Brazaville bewise uDarikwa maduzane le-18 area.
Umgadli uKhama Billiat uligaxe entanjeni kungela kusebenza nzima ngokukhaba ibhola elilahlise unozinti weCongo kwesenxele.
Ukuhlohlwa kwebhola likaKhama kusukumise uzhizhi lwabantu abangene enkundleni yeNational Sports Stadium eHarare.
Abadlali besizwe baqhubeke ngedlabuzane labo beligiqa esiswini senkundla loba nje bengadlalanga ngokufanayo kusigaba sakuqala somdlalo.
Abemanengi amathuba atholwe ngamaWarriors ngaphambili okokuthi isitha besingadliwa phose ngamabhola amane.
Ngemva bekuvalwa ngci nguTeenage Hadebe loTendai Darikwa loMarshall Munetsi.
Iqiniso lapha yikuthi umqeqetshi uSunday Chidzambwa uqale lumdlalo ngendlela etshengisa ukucabanga ngokuhlasela. Lumqeqetshi ubesedume ngokuthi uthanda ukuvala emuva kulokuhlasela.
Kumenzele kuhle lokhu uChidzambwa ngoba iviki lonke ubetshumayela ivangeli lokuthi ufuna ukuhlohla amabhola.
Lonke udonga lwasemuva belwakhiwe kubadlali ababalisa uDarikwa, uHadebe loMunetsi.
Ngaphezu kwalokhu bekukhona uRonald Pfumbidzai, Knowledge Musona, uTalent Chawapihwa loJimmy Dzingayi. Ezihlaselayo bekubalisa uKhama, uTinotenda Kadewere loKnox Mutizwa.
Isigaba sesibili loba singazange silethe ukuthokoza kubabukeli, kulapho okuhlohle khona uKnowledge Musona kulandela ukugxanguza kwemvimbi lonozinti weCongo.
Kusenjalo uChidzambwa, ekhuluma lentatheli kaMthunywa uthe kaboni isizatho sokutshintsha kumbe ukwengenza iqembu lakhe ngoba ubathembile abadlali bakhe.
“Bonke abadlali engibabizileyo ngizahamba labo eEgypt. Akula sizatho sokwesula kumbe ukubiza abanye futhi. Laba engilabo sebesazi ukuthi kuyini okufunwa ngabaqeqetshi,” kutsho lumqeqetshi kuliviki.
Iqula labadlali bakaSunday Chidzambwa
Onozinti: George Chigova (Polokwane City, South Africa), Edmore Sibanda (Witbank Spurs, South Africa), Petros Mhari (FC Platinum).
Imvimbi: Divine Lunga (Lamontville Golden Arrows, South Africa), Marshall Munetsi (Orlando Pirates, South Africa), Teenage Hadebe (Kaizer Chiefs, South Africa), Alec Mudimu (CEFN Druids, Wales), Tendayi Darikwa (Nottingham Forest, England), Jimmy Dzingai (Power Dynamos, Zambia), Ronald Pfumbidzai (Bloemfontein Celtic, South Africa), Godknows Murwira (FC Platinum).
Phakathi: Tafadzwa Kutinyu (Azam, Tanzania), Richard Hachiro (Herentals), Marvelous Nakamba (Club Brugge KV, Belgium), Kudakwashe Mahachi (Orlando Pirates, South Africa), Leeroy Mavunga (Yadah Stars), Knowledge Musona (KSC Lokeren Oost-Vlaanderen, Belgium), Ovidy Karuru, Butholezwe Ncube and Talent Chawapihwa (all Amazulu, South Africa), Kelvin Lunga (SV Rodinghausen, Germany), Khama Billiat (Kaizer Chiefs, South Africa), Danny Phiri (Lamontville Golden Arrows, South Africa).
Abagadli: Tinotenda Kadewere (Le Havre AC, France), Evans Rusike (SuperSport United, South Africa), Admiral Muskwe (Leicester City, England), Knox Mutizwa (Golden Arrows), Abbas Amidu (Arar, Saudi Arabia).
