uMthunywa
Thokozile Mbedzi
KULENDODA yesigabeni esingaphansi kwenduna uNjelele eGokwe ebhaxabulwe ngamasela amathathu ngeSonto yasitshontshelwa imali yenkomo ebisanda kuzithengisa.
UMnumzana Samuel Samu (41) ohlala esigabeni seRingo kubikwa uhlaselwe ngamadoda amathathu emzini wakhe ntambama afika athi afuna imali yenkomo azithengisileyo andubana adliwe ngumnyama leUS$700.
Ekhuluma lentatheli kaMthunywa uMnumzana Ben Ndlovu uthe sebehlalele evalweni ngoba isehlakalo lesi sitsho ukuthi ukuthengisa izifuyo zokuyikubiza izigebenga.
“Silesithuli ngesiga esehlele ubaba uSamu. Wathengisa inkomo zakhe ezimbili embukisweni wathola iUS$700 mhlalokho ebusuku sebelele wangenelwa ngamasela amathathu bambhaxabula ngezigodo andubana bathi abanike imali yenkomo azithengise embukisweni.
“Amasela lawo esethethe imali adliwa ngumswenya, uMnu Samu wasala esehlaba umkhosi omakhelwane bagijima besiya emzini wakhe kodwa abazange babone ukuthi lawo masela aqonde ngaphi,” kutsho uMnu Ndlovu.
Isikhulumi samapholisa esabelweni seMidlands uInspector Emmanuel Mahoko ebuzwa ngodaba lolu uthe solufikile ehofisini yabo ngakho badinga ukuphathiswa nguzulu.
“Udaba lwendoda etshontshelwe imali yenkomo zayo solufikile ehofisini yethu ngakho sicela uzulu ongabe elolwazi aphathise amapholisa ukuze amasela lawa abotshwe.
“Amasela lawa kukhanya abelolwazi olugcweleyo ukuthi bekulombukiso, lokuthi kuthengiswe inkomo.
Njengamapholisa sithanda ukuxwayisa abalimi ukuthi kabazame ukubona ukuthi imali yabo ihlala endaweni ezivikelekileyo njalo kabahambise imali zabo emabhanga bengagcini imali ezindlini,” kuphetha uInsp Mahoko.
