uMthunywa
Mandla Moyo
AMAQEMBU omdlalo wenguqu yobungane kuligi yeBulawayo Social Soccer League (BSSL) athwala induku engena iganga kuyonale impelaviki esiyazingela imiklomelo kunkundla ezisabalale idolobho.
Ukuzingela kumidlalo le kuqala ngehola lesithupha lanye ngoMgqibelo langeSonto kuzaphinda kube leminye imidlalo njalo ezadlalwa ngemva kwemini.
Kuwo wonke amaqembu azangena iganga, ehlasela, akhona akhangalelwe ukuphenduka esejimbile njenjenjwayelo.
Elinye lamaqembu la, ngelikhokhelalayo, eleStars FC elizangena igusu liqonde elokitshini leMagwegwe ukuyadibana leqembu leVula Vale.
Ngendlela amaqembu la adlala ngayo abalandeli bemidlalo yokukwejisa bakhangelele ukuthi bazakholisa.
Abadlali bamaqembu la balethalenta loba sebekhulile.
Umaqhuzu wequla lika-Pool B kuligi yeBSSL, iqembu leDelta lizavakatshelwa yiMabuthweni. Kulumdlalo izethekeli zilakho ukuthola imbila zithutha ngoba iDelta kayithenjwa njengoba kuliqembu eliqethula ezinye zithembile.
Umanqoba ku-Pool B kumnyaka odluleyo iBangane FC, izaphuma ijumo iqone enkundleni yeNketa ukuyadibana leqembu leSekusile.
Emdlalweni lo, akula simanga esikhangelelweyo, okutsho ukuba loba ngubani engaqeda enqobile.
Ngaphadle kwemidlalo ebalisiweyo, okhona eminye ehlelwe kuzo zonke inkundla zeligi leBSSL. Sikhuthaza ukuba abalandeli labathandi bomdlalo wenguqu yethu ukuthi baqhubeke besixhasa, bengakhohlwa lokuthi banxuse abanye.
Imidlalo yethu iyachitha isizungu, okuyikho okufaneleyo kumpilakahle kazulu ngalesi isikhathi.
