Uncategorized

AmaPula ahuga uMasuku

19 Jan, 2023 - 00:01 0 Views
AmaPula ahuga uMasuku uNqobizitha Masuku

uMthunywa

Ricky Zililo
IMALI eyathenjiswa liqembu leBotswana Premier Soccer League iJwaneng Galaxy kwakunzima ukuthi owayengumdlali weqembu leHighlanders, ongumgadli uNqobizitha Masuku ayekele.
UMasuku ube ngumdlali wokucina ukusuka elizweni.

UMasuku, owasuka kuqembu leHighlanders Junior usuke elizweni kuviki ephelileyo esiya eBotswana andubana iqembu leBosso limemezele ngokusuka kwakhe ngemva kokuba selenze isivumelwano leqembu leJwaneng Galaxy ngoLwesibili.

“Njengeqembu sithanda ukumemezela ngokuhamba kukaMsekeli kaKaputeni uNqobizitha Masuku. UMasuku uselesivumelwano sokuyadlalela iJwaneng Galaxy eBotswana. Siyabonga ngomsebenzi kunye lokuzimisela kwakhe kuqembu ngesikhathi elidlalela. Simfisela okuhle kunkambo entsha aseyiqala,” kutsho isitatimende seHighlanders.

Ukusuka komdlali lo oleminyaka engu-29 kube yisimanga ngoba engomunye wabadlali asebebadala kuqembu laMahlolanyama.

Ukusuka kwakhe kutsho ukuthi uMason Mushore, uDarlington Mukulu, uAdrian Silla kunye loGillian Nyathi abavela kuBosso90 sebezalwela ukudlala indawo yakhe yesiswini.

Ekhuluma lentatheli eseBotswana ngoLwesibili, uMasuku, owaqala ukugqoka ijesi yeHighlanders ngomnyaka ka2015 lapho adlala indima enkulu uthe uselungele ukubhekana lengqobe entsha yokudlalela iJwaneng Galaxy.

Lokhu ngokwesibili ukuthi uMasuku adlalele phandle kwelizwe, ngemva kokuqeda umnyaka edlalela iqembu leBuildcon kweleZambia ngomnyaka ka2018. Ngomnyaka ka2016 lo 2017 ubedlalela iqembu leFC Platinum ngemva kokutshiya iHighlanders. Ekuphendukeni kwakhe waba lekhontileka leqembu leHighlanders ngoMpalakazi ka2018 njalo bekumele iphele ngomnyaka ka2024.

FC Platinum

“Ngimanzi te ngokudlalela iJwaneng Galaxy. Sengizimisele ukuthi ngiqale ingqobe entsha. Isithembiso abasenzileyo besikhanga futhi nginanzelela ukuthi ngiyafisa ukubhekana lengqobe kunye lenkambo entsha emsebenzini wami. Ngokunjalo ngenze isivumelwano somnyaka lengxenye leqembu leli.

“Bafike bangiphatha kuhle njalo sengizizwa ngisekhaya. Njengomdlali uyabe ufisa ukwenza kuhle yonke indawo lapho oya khona ngokunjalo lami ngifisa ukuthi ngiphakamise iqembu leJwaneng Galaxy ngomdlalo wami,” kutsho uMasuku.

UMasuku ngumdlali wesibili weHighlanders ukudlalela iqembu leJwaneng Galaxy elihlezi kunombolo yesibili kulogu yeBotswana Premiership lemiklomelo engu-27 ngemva kwemidlalo engu-11.
Kuligi yomnyaka ka2019/20 iqembu leJwaneng Galaxy lamemezelwa njengentshantshu zeligi yeBotswana njengoba lalihlezi phezulu kwelogu ngemva kokudlala imidlalo engu-20 ngesikhathi kumiswa imidlalo ngenxa yobhubhane lweCovid-19.

Share This:

Sponsored Links

Survey


We value your opinion! Take a moment to complete our survey

This will close in 20 seconds