uMthunywa
Nkosilathi Sibanda
AMABANDLA ezokholo kuleli angaphansi kwenhlanganiso ye-Association of the Apostolic Church in Zimbabwe (AACZ) abika ukuthi ukuna kwezulu kuzadala ukuthi udlame lendlala eselizweni iphele.
Amakholwa amabandla la ayedlula i-300 koBulawayo, aphezulu komkhankaso wokukhulekela izulu ngesikhathi sokulima lesi. Kungumbono wamakholwa la labafundisi ukuthi nxa izulu lingana okuzwayo, lilakho ukuletha ukuthula eZimbabwe.
I-AACZ ibiyingxenye yamabandla akade ethe gwaqa enkundleni yeParkview koBulawayo ngeviki eledluleyo lapho okuqale imikhuleko yezulu lokukhulekela umbuso kamongameli uEmmerson Mnangagwa.
Iphephandaba likazulu likhulume lenkokheli yenhlanganiso ye-Runyararo Apostolic Church u-Archbishop Tsungai Vushe obike ukuba imikhuleko yonke kumele ibengeyokucela izulu.
“Ukuze ilizwe liphumelele kumele sitshiyane lokuxabana, ukubanga umbuso, siqine ngokukhulekela ukuthula lokuna kwezulu. Siphakathi kwesikhathi sokulima ngakho asibambaneni siguqe phansi sikhulekele izulu njengesizwe. Izulu liyinsika yokuphumelela kweZimbabwe ngoba umkhonomi wethu ugxile kwezokulima.
“Silapha njengamabandla ayehlukeneyo sizotshengisela usekelo lwethu kunkokheli yelizwe uMongameli uEmmerson Mnangagwa. Singamakholwa avuma ukuthi lo okhethwe esikhundleni kumele asekelwe. Ngakho udlame aluphele. Asikhulekeleni izulu, sithole impumelelo kuminyaka ezayo,” kutsho uArchbishop Vushe.
Umbuthano wakoBulawayo lo ubulandela lo oqhutshelwe eState House eHarare ukhokhelwa ngumka mongameli uAuxillia Mnangagwa.
Ekhuluma phambili kwamakholwa, isikhulumi esikhulu umsekeli kamphathintambo kaHulumende kwezamabhizimusi uRaj Modi uncome kakhulu amaPositoli ngokukhulekela izulu lokuthula.
“Amabandla ezokholo angaphansi kwenhlanganiso yeAssociation of Apostolic Churches in Zimbabwe bahlala njalonje beqhuba imikhosi yokukhulekela ukuthula elizweni, okulinyathelo okumele lilandelwe yizizalwane zonke zeliwe. Asinanzelele ukuthi ilizwe elilokuthula liyaphumelela,” kutsho uModi.
Imbuthano yokukhulekela izulu lokuthula yasungulwa ngumama u-Auxillia Mnangagwa kunyanga ezedluleyo kusendlalelwa ukuqala kwesizini yokulima.
Isizwe sikhangelele isizini enhle nanko izanuse zezulu kunhlanganiso yeMeteorological Services Department ibika ukuba izulu likhona. Labalimi sebekhuthazwe ukuthi bavukele emasimini isikhathi sisekhona.
