uMthunywa
AMAPHOLISA athungatha umkhondo weqembu elimunya abantu igazi kulandela ukuthunjwa kwabantu ababili abahlala eMakause eGermiston, Ekurhuleni andubana bamunywe igazi labo.
UJeffrey Radebe (29) uthe wasuka esiyathatha i-laptop yakhe kumngane wakhe ngeSonto.
“Ngacelwa ngumuntu engingamaziyo ukuthi ngimfuqise imota ngoba ingavuki,” utsho njalo.
Uthe ngesikhathi ebasiza wahlatshwa ngesidakamizwa wasefuqelwa phakathi kwemota yohlobo lweToyota Yaris ngamadoda amathathu andubana basuse imota ngesiqubu.
“Angazi ukuthi kwenzakalani ku-laptop yami kodwa ngiyakholwa ukuthi bayithatha.”
Uthe phakathi kwemota le kwakulomunye laye umfanyana owayekhanya ukuthi usasesikolo.
“Basithatha basisa kwenye indlu. Ngangingabonisisi njalo ngingelamandla kodwa ngabona indoda ingihlaba esandleni nge-syringe.
Ngelanga elilandelayo uJeffrey wavuka ephakathi kwebhokisanyana elele lezinja ezimbili. Uthe waphuma kuleyondawo wangena endlini wafica kulowesifazane owambikela wathi useSprings.
“Ngangingelamandla njalo ngangisiwa ngedwa. Kangikwazi ukuthi kwenzakalani kumfanyana engangilaye emoteni.”
Uthe waphoselwa emoteni njalo waphaphama eseceleni kweMakause Squatter Camp ngoMvulo ebusuku.
Kwabizwa amapholisa ngathathwa ngasiwa esibhedlela lapho odokotela abafika bamngezelela igazi ngoba elahlekelwe ligazi elinengi.
UJeffrey wakhitshwa esibhedlela ngoLwesithathu.
Odokotela bangitshela ukuthi bakhipha umutshana oyingozi emzimbeni wami njalo kukhangelelwe ukuthi ngiphinde njalo ngiyehlolwa.”
USergeant Styles Maome uthe lokhu bedinga izigebenga lezi njalo bakhuthaza abantu ukuthi bangancedi abantu abangabaziyo. — Ubulembu
