Uncategorized

Amapholisa akhuza abafundi beHamilton

16 Mar, 2023 - 00:03 0 Views
Amapholisa akhuza abafundi beHamilton uInspector Abednico Ncube

uMthunywa

Thokozile Mbedzi

ABAFUNDI sebexwayiswe ukuthi batshiyane lokumemethekisa udlame, bakhuthalele izifundo zabo ukuze babe lempilo enhle kwelakusasa.

Isixwayiso lesi sibekwe phambili kwabantwana besikolo seHamilton High koBulawayo ngesikhathi amapholisa eqhuba umkhankaso wokulwisana lodlame lezidakamizwa esikolo lesi ngoLwesithathu.

Isikolo seHamilton sisemlonyeni yabantu elizweni lonke kulandela ukuzibulala komfundi waso ngeviki ephelileyo. Yiso njalo lesi isikolo okuphuma khona umfundi owagwaza umfundi weFounders ngengqamu wafa.

Amapholisa athe eqeda eHamilton, akhuluma njalo ngobubi bezidakamizwa lodlame labafundi bezikolo zeGifford High, Founders High leMontrose Girls High.

Isikhulumi samapholisa koBulawayo u-Inspector Abednico Ncube utshele abafundi ukuthi impilo yodlame lezidakamizwa ayibhadali.

“Lamuhla silapha ezikolo zesigaba seBulawayo East ezibalisela iHamilton, Gifford, Founders leMontrose. Sikhulumisana labafundi ngodaba lokuhlukumezana, ukusetshenziswa kwezidakamizwa,” kutsho u-Insp Ncube.

“Silapha ngendaba esezilokhu zibhoda kunkundla zokuxhumana, kungazange kubikelwe amapholisa. Sikhulume njalo ngezinye esezimangalwe emapholiseni okubalisela olweHamilton, olomfundi ongu Fomu 3.

“Kungakho-ke, sithi abafundi abatshiyane lokuphatheka kwezinye izinto ezingayisizo. Kumele baqaphele ukuthi bazaphazamiseka ezifundweni. Lokhu ngikutsho ngoba ikusasa labo lisezandleni zabo njalo baqaphelisise ukuba nxa bengabotshwa, ikusasa labo lizaphambaniseka ngoba kuza kubanzima ukuthi besulwe ngamapholisa nxa sokumele badinge umsebenzi.”

Uthe nxa abafundi belohlupho kumele batshele ababalisi kumbe baxhumane lamapholisa.

“Njengamapholisa sixwayisa abafundi ukuthi nxa belwisana kumele babikele abazali, amapholisa lababalisi masinyane, bengagcini lokhu kuyimfihlo.

“Sicela njalo ababalisi labaphathi bezikolo basebenzelane lathi ukuze silwisane lodaba lolu. Silethemba lokuba umbiko lo uyezwakala. Sesikhangelele umehluko ekuziphatheni kwabafundi ezikolo zakoBulawayo,” kutsho u-Insp Ncube.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds