YiNtatheli kaMthunywa
KULAMANINA amabili kunye lendoda beMasvingo ababotshelwe ukubulala enye indoda kulandela ukuxabana emtshoveni ngesizatho esingakatholakali.
Abetheswacala uAlouis Charles Dhangu Madembo (25) ovela ngaphansi kwenduna uNyakunhuhwa eZaka, uRosemary Gave (29) ovela ngaphansi kwenduna uChirumhanzu, eMasvingo kunye loViola Linia Tasara (34) ovela ngaphansi kukasobhuku uMusovi enduneni uNemauzhe koChivi babotshwe ngoMgqibelo ekuseni.
Isikhulumi samapholisa eMasvingo uInspector Kudakwashe Dhewa uthe abathathu laba badale icala leli mhlaka 27 Ntulikazi ngehola lika 11 ebusuku lapho umuyi uNyararai Siyavizwa (22) ayevela eMucheke Stadium lapho okwakuleChibuku Show.
“USiyavizwa wagada umtshova elabangane bakhe ababili sebebuyela emzini yabo.
“USiyavizwa labangane bakhe baxabana labetheswacala abathathu labo ababesemtshoveni ofanayo besendleleni. Kukhanya uSiyavizwa wacina ebambana labathathu laba ayelwisana labo,” kutsho uInsp Dhewa.
Kubikwa omunye wabathathu laba wathatha isikhali esicijileyo wahlaba uSiyavizwa emsipheni okwabangela ukuthi ophe kakhulu.
“Abangane bendoda le bazama ukwenza iFirst Aid kodwa wahle bafela lapho. Indaba le yamangalwa emapholiseni, abetheswacala bahle babotshwa ngecala lokubulala,” kutsho uInsp Dhewa.
Uzulu ukhuthazwa ukuthi ehlukane lomkhuba wokulwa nxa bengazwisisani.
“Sikhuthaza uzulu ukuthi nxa kulokungazwisisani kabadinge ongabancedisa ukukhumisana umlotha ngoba sicina silahlekelwa yimpilo zabantu abangelamacala ngendaba okumele zikhulunyiswane,” kutsho uInsp Dhewa.
