uMthunywa
Intatheli kaMthunywa
ZILOKHU zitshwaqe umzimba izakhamizi zakoBulawayo ezigadela endaweni eyaziwa kakhulu ngokuthi kuku 6 kulandela ukugwazwa lokubhaxabulwa komunye uwindi ngomakorokoza akade bezondele ukuthi umuntu abafike bemdinga bamswele.
Kubikwa uLungelo Moyo oleminyaka engu-33 yokuzalwa oweCowdary Park lo Director Sibanda oleminyaka engu-32 oweNkulumane 5 abangela ncwadi ezibavumela ukwemba igolide bafika labanye abahlanu kule indawo behamba ngemota yohlobo lweToyota Hilux.
Kuzwakale ukuba omakorokoza laba, abayisikhombisa bafika ku 6 mhlaka 27 Ntulikazi ngehola lesithathu ngemva kwemini, babuza umamangala ngenye indoda ehlala eMagwegwe aveza ukuthi isihambile. Kubikwa umamangala waphinda wabuza ukuthi bangabe bemdingeleni okuyikho okwahle kwabacunula baqala ukumtshaya ngamampama, langezitina lamatshe andubana omunye ahwatshe ingqamu esikhwameni sebhulugwe amgwaze esiswini okwabangela ukuthi aqaleke.
Kubikwa umamangala wesibili wazama ukukhulumisana labo ukuthi bekele lokhu kodwa laye bamphendukela bamgwaza isihlalo okwenza abantu baqala ukubahlasela, abahlanu benelisa ukubaleka kodwa ababili laba babatshaya omunye baze bamnqunula.
Omamangala bahanjiswa esibhedlela, abetheswacala bahanjiswa enkambeni yamapholisa eCentral.
Isikhulumi samapholisa sixwayise uzulu ukuthi angathwali ingqamu kanye lamabhemba.
“Sikhuthaza uzulu ukuthi angasebenzisi udlakela nxa kulokungazwisisani kodwa kabasebenzise ezinye indlela ezingayisizo kulwa.
“Sicela njalo abangabe belolwazi lokuthi laba abanye abetheswa icala ababalekayo bangaphi ukuze babotshwe,” kuphetha uInsp Ncube.
