uMthunywa
SAQALA sisithi sesikubonile ngeqembu labafana beBulawayo Chiefs, singazi ukuthi khona kuzabuya amantombazana akwazi ngcono ukugiqa ibhola.
Iqembu lamakhosikazi leBulawayo Chiefs liveze ubungcitshi balo ngokunqoba amanye amaqembu abesifazane.
Iqembu leli, beliqale lizwakala ebulenjini be-Twitter, njengokwenziwa liqembu labafana eliku-Castle Lager Premier League.
Lisuke lapho latshintsha igiya lodumo lwalo enkundleni nanko lokhe lingakanqotshwa.
Kumdlalo wakuqala, Amakhosikazi achumisa iqembu lamapholisa eZimbabwe Republic Police ngokuhlohla amabhola ayisithupha eqandeni, okwaveza ukuthi limumethe okunengi. Ngalelo langa amapholisa abuyela enkambeni ezibuza ukuthi athuzane lani ngoba engazange athole ithuba lokuphindisela.
Kulandela umdlalo lo, Amakhosikazi adonse inengi lababukeli labandeli enkundleni yeCowdray Park ngempelaviki lapho elibhaxabule khona “indlovukazi” ze-Ubuntu Queens nge 4-0.
Kulumdlalo, Amakhosikazi angene adlala sengathi athunywe ukuzobhidliza nanko kuthethe imzuzu edlula amatshumi amabili ibhola likhatshwa ngabadlali bayo kuphela.
Iphephandaba likazulu lizibonele mathupha isizatho sokunqoba kwamantombazana la. Ngaphandle kokuthola ulwazi kumqeqetshi uEvans Neta, abadlali baphethwe njengeqanda njalo bakhomba ngophakathi. Kusukela ngesikhathi sokulolonga phakathi kweviki, Amakhosikazi aphiwa ukudla komsoco, okwakha umzimba, okufanele abadlali bebhola lenyawo.
Enkambeni yalithimu kulandelwa izicebiso zabodokotela njalo iqembu lenza inhlelo lilandela izeluleko eziqonqoselwa yinhlanganiso ephethe umdlalo umhlaba wonke eyeFIFA.
FIFA
Nxa kuqathaniswa lamanye amaqembu amantombazana kuSouthern Region Women’s League, Amakhosikazi agcinwe kuhle, okuyikhona okwenza kube lula ukuthi adlale inguqu ehlabusayo.
Umqeqetshi uNeta wazise intatheli kaMthunywa ukuthi balande ukunqoba isicoco seligi kuphela.
“Kukho konke esikwenzayo, okumqoka yikulolongela ukuthi sinqobe imidlalo yethu,” kutsho umqeqetshi lo.
“Ukunqoba kwethu kuvela ekuthini sisebenza gadalala andubana siye emdlalweni.
Kumidlalo yethu emibili edluleyo sikutshengisile lokhu.
Ngilokuthaba ekuthini abadlali bami babonise ukuba bukhali phambili kwegedi. Kumele kuqhubeke kunje, ngiyabakhuthaza.
Sesiliqembu elitshayisa amanye ngovalo.”
UNeta uthe nxa imidlalo ingaqhubeka ngendlela afuna ngayo, Amakhosikazi azaphetha iligi engahlohlwanga.
“Nxa ngikhangele kwelizayo, angiboni ukuthi likhona iqembu elingasihlohla.”
Loba ebike ukuba bonke abadlali bakhe benza kuhle, uNeta uthembe kakhulukazi abagadli ababalisa uNothabo Nkabinde owahlohla amabhola amabili bedibene leqembu le-Ubuntu Queens.
Abanye abadlali nguThobekile Mtambo, Patience Ndlovu loLaureen Mupasi owaligaxa entanjeni kathathu phezulu kwamapholisa.
Kusenjalo, ngoMgqibelo enkundleni yeBulawayo Chiefs Village, Amakhosikazi anxusa iqembu leNketa iStreet Set kumdlalo wesithathu weligi.
Kulumdlalo Amakhosikazi kuzamele aqaphele ngoba amantombazana eStreet Set alakho ukuthi awemuke esikhundleni.
IStreet Set yiyo ekhanya iqinile kuzo zonke izitha ezikhona kuligi. IHighlanders Royals ibiza iWestern Rangers ngehola lesithathu emini ngoMgqibelo
Impumela yemidlalo ngeviki eledluleyo:
Street Set 3 Bulawayo Queens 0; Black Boots 0 Entumbane 3; Western Rangers 0 Las Palmas 1; New Orleans 6 Highlanders Royals 0; Ubuntu Queens 0 Bulawayo Chiefs 4
Imidlalo ekhona ngoMgqibelo:
Bulawayo Chiefs v Street Set (Bulawayo Chiefs Village), Bulawayo Queens v Black Boots (Mandwandwe), Entumbane v New Orleans (Pumula North), Highlanders Royals v Western Rangers (Highlanders Clubhouse), Las Palmas v Lobengula City (Queens), Ubuntu Queens v ZRP Bulawayo (TM Cowdray Park Ground)
