uMthunywa
YiNtatheli kaMthunywa
IPHUPHO labadlali abasakhulayo kuqembu leHighlanders lingatshabalala nxa kungadlala uMkhokheli Dube labanye abadala.
UDube, oleminyaka engu-36 yokuzalwa, ubangisa ukudlala kuHighlanders kulezi insuku, okuyikhona osekuvuse inkophe kubalandeli benguqu bezibuza ukuthi udingani. UDube wakhafulwa zintshantshu zeligi iFC Platinum isibona ukuthi kaselandawo kuthalenta labafana abancane abakhona.
Ayisuye yedwa lumdlali osekhule iminyaka ozama ukupikwa kuBosso. Abanye okuzwakale bezama inhlanhla ngu-Obadiah Tarumbwa loMitchel Katsvairo.
UTarumbwa wake wathenjwa kuleliqembu ngesikhathi esasengumfana omncane. Uncenga ukuphenduka eMagumeni eseleminyaka engu-35 yokuzalwa ngemva kokuyifulathela okweminyaka eyedlula itshumi. UKatsvairo laye usebanga emaphethelweni okulikhahlela.
Kubikwa abaqeqetshi baleliqembu bayawukhwabitha umdlalo kaMkhokheli. Abafakazi abaqotho abancwebe uMthunywa indlebe babike ukuba uDube obegijima kuFC Platinum ngesizini edluleyo usebalelwa kubadlali abathile asebebonwe ngabaqeqetshi.
Ukugijima labadlali abasakhulayo ababumba iHighlanders okwenziwa nguDube labanye kuza kulandela isimemezelo somqeqetshi uMark Harrison, lapho abika ukuthi udinga abagadli asebelohlonzi kunobhutshuzwayo.
Umdlali lo wadlala kuBosso ngesizini ka-2003 andubana ayephetsheya kuqembu leMichigan Bucks eMelika. Uphinde wadlalela amaqembu abalisa Michigan Bucks, Delaware Dynasty, New England Revolution, Amazulu leChicago Fire.
Kodwa ke, lukhona usizo olungeza labadlali laba.
Ngenxa yokuthi iHighlanders isilela ngabagadli, bobathathu, munye ngamunye, balethuba lokutshengisa umqeqetshi omutsha uHarrison ukuthi yibo abangalihlohlela iqembu. Kubikwa ukuza kwabadlali laba yisifiso sezinye inkokheli zeqembu njalo bahugwe yikuzwa ukuthi uHarrison udinga umgadli.
Ngendlela umqeqetshi lo adinga ngayo abadlali, kuveza ukuthi kasuthiseki ngesimo sabadlali abakhona.
Kuzwakale ukuthi kulengxoxo ezithile, esezifike ibanga laphezulu phakathi kwe-Bosso loDube.
Umfakazi othembekileyo oseduzane lethimu wazise ukuba kusukela ngeviki eledluleyo, uDube ubephethe etshitshela emawofisini eqembu.
“Yebo, umdlali lo (Mkhokheli Dube) kungenzeka angene emzileni wokuya kuHighlanders. Uphethwe emlonyeni yabadala kodwa akwaziwa ukuthi kuzaphetha ngani.
“Abaqeqetshi bayamfuna lumdlali, akufihlwa lokhu. Kudingwa umuntu ohlohlayo kuHighlanders, ngakho umdlali onjengaye engabasukumisa abalandeli ngokuhlohla,” kutsho umfakazi lo othembekileyo.
Kusenjalo, iqembu liqale iviki le ngesivuvu kulandela ukuza kwabadlali balo bonke. Umqeqetshi usalinde incwadi yemvumo yokusebenza kuleli andubana umqondo wakhe ucace.
