uMthunywa
Yintatheli kaMthunywa
IQEMBU leHighlanders liphakathi kwengxoxo leziphathamandla zenye inkampani ye-China ngemizamo yokubambisana ukwemba igolide.
IHighlanders ilomgodi wegolide esigabeni seBubi esabelweni seMatabeleland North.
Ngemva kokuthola ichence lemvumo yokuqala umsebenzi wokwemba igolide, iHighlanders ibika ukuthi ikubone kufanele ukuthi ihlale phansi lezazi zokuqhutshwa kwebhizimusi lokwemba igolide.
UMgcinisihlalo weqembu uKenneth Mhlophe uthe baphakathi kokukhulumisana leziphathamandla zamabhizimusi eChina ezikhwabitha ukusebenzelana leqembu.
IBosso liqembu lakuqala ukuthola ibhizimusi lokwemba kuleli.
“Siphakathi kokuxoxisana lezazi kwezokwembiwa kwegolide zeChina. Inhloso yikuthi iqembu liqhube leli ibhizimusi elitsha ngemfanelo,” kutsho uMhlophe.
UMhlophe, odinga ukubuyiselwa kusikhundla sikaMgcinisihlalo kukhetho oluzakuba khona kwelizayo, uthe amalunga eqembu labo abakholwe ukuthi iqembu lizaphakama ngokuthola umgodi wegolide.
“Sesihlole sahlolisisa isimo sebhizimusi. Kusiyaphambili, ngilesiqiniseko sokuba umgodi lo uzaqeda zonke inkinga zemali ebeziphethe iqembu lethu,” kutsho uMhlophe.
Iqembu lakoBulawayo leli kubikwa lidinga US$10 miliyoni ukuthi lenelise ukuqala ukwemba.
“Sifuna ukuthi umgodi lo ubeyilifa kulabo abazadlala kuHighlanders kuminyaka ezayo. Singazimisela kubhizimusi lomgodi lo, kunengi esizakwakha kuHighlanders.
Ugatsha lwezokwemba kuHulumede lwanikeza iqembu leli lathola imvumo yomgodi wegolide lo ngoMpalakazi odluleyo.
Umbono wokudinga ibhizimusi leli kubikwa wavela lapho sekunanzelelwe ukuthi iHighlanders ibisihlala icela uncedo ukuze iphilise abadlali, ibhadale lezikwelede.
