YiNtatheli kaMthunywa
UZATSHIYA ukuqeqetsha iHighlanders ngenyanga ezayo uMadinda Ndlovu nxa ezavuma ukuthi aphange ukuya eBotswana.
Abasiki bebunda abaseduzane lomqeqetshi bancwebe uMthunywa indlebe babika ukuba ngempela iqembu leGaborone United limhlezi eqolo lifuna ukuthi asebenze kulo.
Kubikwa imali ibuzana amavuko kuleliqembu eselizimisele ukuthi lithulule inqwaba yama-pula esikhwameni sikaMadinda.
Ngokunjalo, abaphathi beGaborone United okuzwakala ukuthi abathikazi nxa kukhulunywa ngemali, abazange bakufihle ukuthi ngoLwesibili lweviki ezayo kuzavela ukuthi uMadinda usengowabo.
“Okutshiwo kungatsha ze-social media yikho. UMadinda Ndlovu usemehlweni eGaborone United,” kutsho esinye isiphathamandla seHighlanders sikhuluma lentatheli kaMthunywa.
Kukhanya iqula lenkokheli zeHighlanders zisayethukile ngokuzwa ukuthi umqeqetshi usefulathela iqembu.
Imizamo yokuthola umbiko ophuma emahofisini eBosso mayelana lodaba lolu yehlule ngesikhathi sokuyadinda iphephandaba kodwa uMthunywa ukubeka kuzulu ukuthi ngoLwesine emini iqiniso lizavela.
Kukhangelelwe ukuthi ngoLwesine kumbuthano wentatheli loMadinda kanye lomaqhuzu wayo uNhlanhla Dube kuzahlafunwa loludaba olusegudwini.